Disa ditë më parë, më 11 Shkurt, në qytetin e Durrësit u zbulua një tjetër rast me meningjit. Një djalë rreth moshës 14-vjeçare u diagnostikua me këtë sëmundje dhe u dërgua në spitalin e QSUT, ku ndodhet në kujdesin e mjekëve.
Ky është rasti i dytë me meningjit në qytetin bregdetar. Në Dhjetor të vitit të kaluar u regjistrua një rast fatal, pasi si pasojë e sëmundjes humbi jetën një 17-vjeçare.
Mëngjesin e kësaj të shtune në “Aldo Morning Show” ishte i ftuar mjeku Ilir Alimehmeti. Ai tha për publikun se kjo është një sëmundje e rëndë me një shkallë vdekjeje të lartë, por në vendin tonë dhe në të gjithë Europën nuk është shumë e përhapur.
“Ky është një infeksion i cili vesh trurin, sistemin nervor qendror dhe kur këto infektohen quhet meningjit. Kujdes! Është patjetër hall për të gjithë ata që janë të prekur nga kjo sëmundje. Padyshim që nuk është një sëmundje e lehtë, është një sëmundje goxha e fortë, mund të jetë goxha e rëndë. Ka një shkallë vdekjeje që ne të sëmundjeve infektive e quajmë të lartë, 8 deri në 10% quhet e lartë tek ne, shumë e lartë madje. Por, fatmirësisht rastet janë pak, janë shumë pak. Po shkuam ne në nivel Europe zakonisht raportohet për pak qindra ose diçka më shumë se 1000. Them që ka pak, kur janë raste të izoluara dhe janë numra të vegjël. Shumë prej nesh i mbajnë këto baktere dhe këto lloj bakteresh ndodhen në grykën e shumë njerëzve. Nga studimet e fundit është parë që 2 deri në 20% e popullatës i kanë normalisht dhe janë të shëndetshëm, rrinë aty dhe nuk shkaktojnë sëmundje. Kurse, në raste të tipave të veçantë shkaktojnë sëmundje të rëndë madje çon deri në humbjen e jetës. Pra kjo nuk e bën të kuptueshme që dy gjininë e kanë këtë bakter dhe persona të tjerë sëmundje, madje shumë rëndë. Këtu kemi një situatë e cila ka një hapësirë diskutimi. Si sëmundje është e frikshme tek individi që preket, por fatmirësisht numri i individëve që preken janë shumë pak në krahasim me sëmundjet e tjera infektive.”
Ai shtoi se për këto baktere që shkaktojnë meningjitin ka vaksina, por të cilat nuk janë të detyrueshme. Kjo lë të kuptohet se kjo sëmundje infektive është e kurueshme, aq më tepër kur kapet në kohë. Nga ana tjetër mjeku tha se kjo sëmundje shkaktohet nga kontakti tepër i ngushtë me njerëzit, prandaj duhet pasur kujdes.
“Për shumë nga këto baktere ka vaksina, nuk janë të detyrueshme askund në Europë sepse sëmundja nuk është aq e përhapur. Për këtë arsye nuk është në kalendarin e vaksinave as në Shqipëri dhe as në pjesën tjetër të Europës. E dyta, duhet një kontakt shumë i ngushtë që të ta ngjitë dikush sëmundjen. Nëse dikush rri shumë afër me dikë dhe për një kohë të gjatë, ekziston mundësi për infektim. Por, dhe për këtë rast ka antibiotikë, i cili bëhet nga pediatri, flasim këtu për rastet tek fëmijët.”
