SPAK kërkon shpalljen fajtor të deputetit Gazment Bardhi për “shpifje” ndaj Edmond Sula, ish-drejtuesit të Policisë së Shkodrës.
Por gjyqtarja Flojera Davidhi rrëzoi kërkesën e SPAK dhe e shpalli të pafajshëm ligjvënësin demokrat. Në seancën e sotme, pas riçeljes së pjesshme të shqyrtimit gjyqësor, gjykata ka administruar përgjigjen e SPAK për kodet SKY ECC të pohuara nga deputeti Bardhi.
SPAK ka konfirmuar se kodet përkatëse i përkasin dosjes së një çështjeje nën hetim, por për shkak të sekretit hetimor, nuk i ka vënë në dispozicion përmbajtjen e bisedave të kërkuara.
Nga ana tjetër, avokatët e Bardhit i thanë gjykatës se klienti i tyre është i pafajshëm, me argumentin se deklarimet në parlament janë bërë në cilësinë e deputetit dhe në interes të opinionit publik.
Përfaqësuesi ligjor i Bardhit, Marash Logu tha për mediat pas vendimit se “Gykata iu referua ligjit e provave e vendosi të deklarojë të pafajshëm Gazment Bardhi duke provuar që Gazment Bardhi nuk shpif e as nuk fyen por i referohet vetëm fakteve e dokumenteve zyrtare”.
Ai u shpreh se të gjitha paditë ndaj Gazment Bardhit do të kenë të njëjtin fat, përfshirë edhe ajo e KESH.
Ndërsa shtoi se “Belinda Balluku fshihet dhe keqpërdor vartësit e saj të OSHEE dhe KESH për të mos u përballur me akuzuat e vjedhjes dhe shpërdorimit të saj në sektorin energjisë elektrike”.
Sulaj paditi Bardhin për “shpifje” e “fyerje” për shkak të deklaratave të këtij të fundit në një seancë plenare të Kuvendit në shtator 2024, ku deklaroi se Sulaj ishte emëruar nga bandat në krye të Policisë së Shkodrës.
- Çfarë deklaroi Bardhi më parë për Edmond Sulën?
“Si ta quajnë drejtorin e Policisë Shkodër, ta them unë kush ta ka emëruar. Kodi Sky ECC, o vëlla ka llafe për atë mikun tënd ministër të Brendshëm, di gjë ti?! Po, por kam frikë se nuk e bën. Ndërhyn prapë, mua Mondi më duhet një dimër aty vëlla. Mondi në fakt është drejtori aktual i Policisë Shkodër që u emërua një muaj pas këtij ministrit në fjalë, përfaqësues i një prej bandave më të rrezikshme në vend. Për çfarë e akuzon ti opozitën?! Ne po abuzojmë me të drejtën për të kërkuar ty llogari?
Po patjetër që do japësh llogari. Kur zotrote i ke dorëzuar pushtetin, policinë e portin e Durrësit krimit të organizuar, përgjegjësia i mbetet opozitës. Ky nuk di asgjë, këtij ia hanë dardhat pas shpine, ky është i pafajshëm, fajin e ka opozita që e baltos dhe ky nuk ka asnjë shpjegim. Ju them me përgjegjësinë më të madhe qytetare dhe morale thotë ky, përveçse politike që Ilir Beqaj është sot ministri më i sulmuar si Tahiri që është i kryesulmuar, janë reformatorë. Kjo ishte deklarata dhe kur i dolën faktet se si njëri, si tjetri kishin abuzuar me detyrën, tha “di unë ç’kanë bërë ata?!”, ka thënë më parë Bardhi duke ngritur akuza ndaj ish-drejtorit të policisë.
