Një grup i strukturuar kriminal, me pjesëtarë shtetas nga Shqipëria dhe Kosova, që falsifikonte dokumente me qëllim shitjen është goditur nga Policia e Tiranës.
Si rezultat i operacionit të koduar “Njësia” janë arrestuar 6 persona, teksa janë sekuestruar 15 dokumente, të huaja dhe shqiptare, të dyshuara false, si dhe 7 celularë dhe 1 motomjet.
Më konkretisht në pranga janë vënë shtetasit Kushtrim Doksani, 35 vjeç, banues në Tiranë, Kujtim Gilani, 57 vjeç, banues në Prizren, dhe Getoar Luzha, 28 vjeç, banues në Kaçanik. Gjithashtu, u ndaluan me iniciativë shtetasit Kujtim Duka, 56 vjeç, Leonard Basha, 58 vjeç dhe Erina Doksani, 20 vjeçe, të tre banues në Tiranë. Ata akuzohen për veprat penale “Falsifikimi i dokumenteve”, “Falsifikimi i letërnjoftimeve, i pasaportave ose i vizave” dhe “Ndihma për kalim të paligjshëm të kufijve”.
Autoritetet raportojnë se nga hetimi ka rezultuar se këta shtetas, të organizuar si grup, falsifikonin dokumente të ndryshme, me qëllim shitjen shtetasve që synonin të lëviznin ilegalisht, drejt shteteve që kërkojnë viza.
Hetimet janë kryer nga seksionit kundër Krimeve Ekonomike në Policinë e Tiranës dhe Njësia e Përbashkët e Investigimit me ShBA-në, në drejtimin e Prokurorisë së kryeqytetit.
Policia bën me dije se gjatë këtij operacioni janë sekuestruar në cilësinë e provës materiale:
-3 pasaporta dhe 3 karta identiteti amerikane;
-2 pasaporta, 2 karta identiteti dhe 1 leje drejtimi italiane,
-1 pasaportë dhe 1 leje drejtimi angleze;
-1 leje drejtimi rumune;
-1 kartë identiteti shqiptare.
Së bashku me dokumentet e dyshuara të falsifikuara u sekuestruan 7 celularë dhe 1 motomjet.
Materialet procedurale iu referuan Prokurorisë së Tiranës për veprime të mëtejshme.
