Qeveria ka marrë vendimin për të shtyrë afatin e vlefshmërisë së kartave të identitetit dhe pasaportave, në kuadër të zgjedhjeve parlamentare të 11 Majit.
Vendimi është marrë në mbledhjen e sotme të Këshillit të Ministrave, teksa u bë me dije nga ministri i Brendshëm Ervin Hoxha, pas mbledhjes së qeverisë. Sipas tij, kjo masë do t’ju japë zgjidhje ngërçit të krijuar pasi janë rreth 500 mijë shtetas shqiptarë që u ka përfunduar vlefshmëria e kartave të identitetit.
“Këtë të mërkurë, Këshilli i Ministrave miratoi aktin për zgjatjen e afatit të vlefshmërisë së kartave të identitetit dhe pasaportave biometrike. Kjo masë do të zgjidhë situatën aktuale, duke i dhënë mundësi shumë shpejt 500,000 shtetasve shqiptarë, të cilëve u ka përfunduar vlefshmëria e kartave të identitetit. Me miratimin e këtij akti, shtetasit shqiptarë që jetojnë jashtë vendit, do të kenë mundësinë për të ushtruar të drejtën e votës si një e drejtë kushtetuese. Me miratimin e këtij akti të gjithë shtetasit shqiptar do të votojnë sipas udhëzime të KQZ duke u regjistruar në Platformën Elektronike të Regjistrave të Komisionit Qendror të Zgjedhjeve”. tha ministri Hoxha.
I pyetur për propozimin e PD-së që të votojnë edhe shqiptarët të cilët jetojnë jashtë, por s’kanë dokumente shqiptare, ministri tha se kjo është e pamundur.
“Ligji nuk e parashikon. Të gjithë shtetasit shqiptarë të cilët kanë kartë identiteti të pavlefshme dhe pasaporta biometrike të pavlefshme, pas miratimit të aktit që ne bëmë sot do të kenë mundësi të regjistrohen në platformën e Komisionit Qendror të Zgjedhjeve sipas udhëzimeve të KQZ”, tha Hoxha
