Deputetja e PD Ina Zhupa, ka deklaruar se seanca plenare e mbajtur ditën e enjte, ishte një nga më të turpshme, pasi sipas saj, ligjet që kaluan, favorizojnë oligarkët.
E ftuar në News24, Zhupa u shpreh se gjithçka bëhet me qëllim përfitimin e sa më shumë votave nga ana e mazhorancës në pushtet.
“Seanca e enjte është nga më të turpshmet në lidhje me ligjet që kaluan, që i shërbejnë oligarkëve dhe jo interesit të përgjithshëm të qytetarëve.
Në seancën e të enjtes kaloi për të 7 herë gjatja e afateve për investimet strategjike, ku ndërsa kanë mbaruar zonat bregdetare dhe bregliqenore, pritet t’i drejtohen zonave të mbrojtura.
Ligjvënie elektorale që të përfitojnë grupe të caktuara që të përkthehet në vota për PS”, tha ajo.
Zhupa u ndal edhe në protestën kombëtare të paralajmëruar më 8 shkurt, ku ka zbuluar disa detaje nga organizimi. Ajo deklaroi se protesta do të jetë e përqendruar përpara Kryeministrisë dhe jo të shpërndahen në disa pika në Tiranë, siç ka ndodhur në 3 protestat e shkuara.
Zhupa shtoi se një nga shtysat për protestën ka qenë pikërisht dëshmia e dhënë nga ish zëvendës kryeministri Arben Ahmetaj.
“Kjo protestë vjen si rezultat i dëshmisë së Ahmetaj që tregoi një pjesë madhore të korrupsionit dhe se si Organizata kriminale “Rilindja” vjedh e shpërdoron taksat publike duke i bërë qytetarët të jetojnë më të varfër. Dëshmia e Ahmetaj, një nga shtysat për protestën kombëtare. Ne nuk heqim dorë nga kërkesat, edhe për qeveri teknike.
Protesta themelin e ka në masivitet, një protestë kombëtare që do të ketë nga gjithë Shqipëria e do të vijën në Tiranë.
Nuk do të dalim në disa rrugë, por do të bëhet para Kryeministrisë në bulevardin “Dëshmorët e Kombit”.
Për mënyrën dhe kohëzgjatjen nuk duam që t’i zbulojmë paraprakisht, por pika e fortë siç thashë është masiviteti.
Do të shihni pjesëmarrje të madhe edhe nga diaspora, sidomos nga vendet fqinje që e kanë edhe më të lehë të vijnë”, tha ajo.
