Prokuroria e Gjirokastër ka lëshuar 12 urdhër-arreste të reja në kuadër të operacionit të koduar “Andromeda”, për goditjen e një grupi që merrej me trafikun e lëndëve narkotike dhe kontrabandës me mallra, duke e çuar në 17 numrin e të arrestuarve në total.
Në operacionin e fundit janë ekzekutuar 10 masa sigurie “Arrest me burg” dhe dy masa “Arrest në shtëpi”, teksa janë pezulluar nga detyra dhe dy efektivë të policisë kufitare të doganës së Kakavijës.
Më konkretisht janë arrestuar shtetasit:
– Herolind Haskaj, 38 vjeç, Dorian Osmani, 38 vjeç, Kevin Gega, 26 vjeç, Bledar Caka, 42 vjeç, Redon Gjini, 33 vjeç dhe Elidon Tocka, 35 vjeç, banues në Gjirokastër, për veprën penale “Prodhimi dhe shitja e narkotikëve, kryer në bashkëpunim.
– Ilia Koçollari, 49 vjeç, Eno Dulaj, 22 vjeç, Ervis Çelo, 36 vjeç, banues në Gjirokastër, për veprën penale “Prodhimi dhe shitja e narkotikëve”;
-Si dhe për shtetasin Thoma Karanxha, 41 vjeç, banues në Gjirokastër, për veprën penale “Ushtrimi i ndikimit të paligjshëm ndaj personave që ushtrojnë funksione publike”.
Gjithashtu, janë ekzekutuar dhe masat e sigurisë “Arrest në shtëpi”, për shtetasit Elvin Norra, 25 vjeç dhe Mario Feruni, 23 vjeç, të dy banues në Gjirokastër, për veprën penale “Kontrabanda me mallra të tjera”, kryer në bashkëpunim.
Ndërkohë, Agjencia e Mbikëqyrjes Policore ka ekzekutuar masat e sigurisë “Pezullim i ushtrimit të një funksioni apo shërbimi publik”, për shtetasit L. K., 32 vjeç dhe O. B., 29 vjeçe, të dy banues në Gjirokastër, me detyrë punonjës policie në PKK Kakavijë, për veprën penale “Shpërdorimi i detyrës”, kryer në bashkëpunim.
Sipas autoriteteve, nga hetimet ka rezultuar se këta shtetas në bashkëpunim me 5 të tjerë të arrestuar në datat 25 Tetor 2024 dhe 13 Nëntor.2024, të organizuar si grup, janë të implikuar në veprimtarinë kriminale të shitjes së lëndëve narkotike, në doza, kryesisht në Gjirokastër.
Gjatë kontrolleve të ushtruara për të gjetur provat materiale me qëllim të dokumentimin ligjor të veprimtarisë kriminale të këtyre shtetasve, raportohet se janë gjetur dhe sekuestruar shuma të konsiderueshme vlerash monetare, lëndë narkotike Cannabis dhe Kokainë, municion luftarak, celularë, automjete, dokumente të falsifikuara, mallra kontrabandë etj.
Kujtojmë se më herët në kuadër të këtij operacioni janë arrestuar dhe shtetasit:
- Kryekomisari Alfred Kondi, me detyrë Shef i Sektorit të Krimit të Organizuar në Policinë e Gjirokastrës, i dyshuar për veprat penale “Shpërdorim i detyrës” dhe “Shpërdorim i autoritetit policor” kryer në bashkëpunim.
- Nënkomisari Xhevit Dine, me detyrë Specialist në Seksionin e Inteligjencës dhe Arkivës Kriminale, i dyshuar për veprën penale “Shpërdorim i detyrës” kryer në bashkëpunim.
- Bledar Mustafaraj, me detyrë doganier, niveli C2 në degën doganore Kakavijë, i dyshuar për veprave penale “Falsifikim i dokumentave” dhe “Kontrabanda nga punonjës që lidhen me veprimtarinë doganore”.
- Ili Muho, i dyshuar për veprat penale “Kontrabanda me mallra të tjera” dhe “Falsifikim i vulave, i stampave ose i formularëve” kryer në bashkëpunim.
- Kleodor Kazo, i dyshuar për veprat penale “Kontrabanda me mallra të tjera” dhe “Falsifikim i vulave, i stampave ose i formularëve” kryer në bashkëpunim.
Gjithashtu në kërkim është shpallur inspektori Feim Onjea, me detyrë Trupë Shërbimi Operacional në forcën e posaçme Shqiponja, i dyshuar për veprat penale “Shpërdorim i detyrës” dhe “Shpërdorim i autoritetit policor” kryer në bashkëpunim.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
EMRAT/ Arrestohet shefi i Krimeve dhe nënkomisari në Gjirokastër, në pranga dhe një doganier
