Kreu i PD-së, Sali Berisha gjatë një konference me gazetarët, ka propozuar ngritjen e një bordi të fiksimit të euros, në kohën kur PD do të vijë në pushtet.
Berisha tha ky bord do të bëhet për të shpëtuar eksportet, pasi do të qeveria do të kompensojë eksportuesit për të gjithë humbjen që kanë nga rënia e euro dhe kompensimi do jetë nga niveli i euros në treg me nivelin e fiksuar nga qeveria.
“Është e domosdoshme një ndërhyrje urgjente për shpëtimin e eksporteve dhe nxitjen e tyre. Së pari, qeveria do krijojë bordin e fiksimit të euros. Nuk mundet që narkoeuro të shkatërrojë në këtë mënyrë ekonominë shqiptare.
Qeveria do kompensojë eksportuesit për të gjithë humbjen që kanë nga rënia e euro dhe kompensimi do jetë nga niveli i euros në treg me nivelin e fiksuar nga qeveria. Pra, në qoftë se themi një euro me 138 lekë dhe në treg shkëmbehet me 100 lekë, çdo euro do i kompensohet eksportuesit me 38 lekë.
Në këtë mënyrë ne do zerojmë efektin toksik të narkoeurove në ekonominë shqiptare. Të paktën në eksportet. Krijimi i bordit do të jetë një nga aktet e para pas inaugurimit të qeverisë së PD-së”, tha Berisha.
Ndërkohë Berishës iu kujtua nga gazetarët se ai i ka quajtur komuniste bordin e krijuar nga qeveria e Ramës për naftën dhe ushqimet. Por ish kryeministri kishte këtë sqarim:
“Nuk ka asgjë të përbashkët. Qëndrimi komunist në këtë rast do të ishte fiksimi, ose shkëputja fare nga euro, në diktaturë dollari mund të ishte 1 mijë lekë, ai shkëmbej me 100 lekë. Ne nuk e bëjmë këtë. Ne respektojmë luhatjen e tregut, por me bordin tonë ne kompensojmë eksportuesit. Nëse bordi i Ramës për naftës diktonte çmimin e naftës, ne nuk do diktojmë kursin e euros. Ne kompensojmë, diferencen mes kursit të lirë të këmbimit dhe një kursi që sa ta vlerësojnë specialistët. Këto 300 psh lekë diferencë do ti paguhen eksportuesve. Kjo ka të bëjë me mbrojtjen të një sektori që dëmtohet tërësisht nga veprimi i narkoeuros në performancën e tyre”, deklaroi ai.
