Një i mitur nga Korça ka humbur jetën në ambientet e QSUT-së në Tiranë. Mësohet se viktima është një 12-vjeçar nga fshati Pocestë, i Bashkisë Maliq, teksa ishte nxënës në klasën e 7-të në shkollën e fshtatit Vashtëmi.
Burime bëjnë me dije se shkaku i ndarjes nga jeta të të miturit janë problemet kardiake që ka shfaqur 12-vjeçari, gjithsesi pritet ekspertiza mjeko-ligjore për ta përcaktuar shkakun e saktë.
Mësohet se fillimisht i mituri është dërguar në urgjencën e Korçës me tension të lartë, ndërsa pas kontrollit është nisur menjëherë drejt Tiranës për mjekim më të specializuar, por fatkeqësisht ka humbur jetën.
Burime nga spitali i Korçës bëjnë me dije se 12 vjeçari ka shkuar në spital rreth 10 ditë më parë me simptoma gripi dhe pasi është mbajtur nën kujdesin e mjekëve gjendja e tij është përmirësuar dhe ka dalë nga spitali në datën 31 dhjetor. Më pas ai është shoqëruar përsëri nga familjarët në spital pasi kishte të vjella dhe nga analizat ka rezultuar se kishte gliceminë e rritur ndaj dje në mëngjes është dërguar drejt Tiranës ndërsa mbrëmjen e kaluar ka pësuar arrest kardiak duke humbur jetën
Ka qenë shkolla e fshatit Vashtëmi që ka njoftuar edhe ngjarjen e rëndë, ndërsa burime për mediat bëjnë me dije se i mituri ka qenë i shtruar dy herë në spital për shkak të problemeve shëndetësore që mund të lidhen me zemrën dhe diabetin.
Për shkak të moshës së re dhe rrethanave të vdekjes së papritur, policia ka nisur mëngjesin e sotëm hetimet lidhur me rastin për të zbuluar shkaqet e vdekjes së të miturit.
Ky rast ka shtuar shqetësimet për rritjen e rasteve të vdekjeve nga problemet kardiake tek moshat e reja në qarkun e Korçës. Në mes të Dhjetorit, një 16-vjeçar nga fshati Barç i Korçës humbi jetën si pasojë e një ataku kardiak, teksa ndodhej në banesën e tij ku prezentë kanë qenë dhe familjarët e tij.
Gjithashtu, dyshohet se nga ataku kardiak kanë humbur jetën dhe një 17-vjeçare ntga Pogradeci dhe një 15-vjeçare nga qyteti i Ersekës, ngjarje të regjistruara kohët e fundit.
