Ish-Presidenti i Republikës, Ilir Meta do të lërë për disa orë ditën e sotme qelinë, pasi do të merret në pyetje nga Prokuroria e Posaçme (SPAK), në lidhje me çështjen “CEZ-DIA”, për të cilën edhe akuzohet.
Meta pritet të paraqitet në orën 10:00 para oficerëve të BKH-së për t’u marrë në pyetje si person nën hetim. SPAK e akuzon Ilir Metën se ka ndërmarrë veprime korruptive për kontratën CEZ-DIA në kohën kur ka qenë ministër i Energjetikës gjatë qeverisjes “Berisha 2”.
Kreu i Partisë së Lirisë ndodhet në paraburgim që prej 21 Tetorit të vitit të kaular, kur u arrestua dhunshëm nga Policia në mes të ditës, në hyrje të Tiranës, pranë “Casa Italia-s”. Ai ndodhet në paraburgimin e burgut “313” në Tiranë, teksa masa e sigurisë ndaj tij është konfirmuar edhe nga Gjykata e Posaçme e Apelit.
Ilir Meta reagoi ditën e djeshme nga qelia, përmes një postimi në rrjetet sociale, ku shkruante se lajmin se do të merrej në pyetje nga SPAK, e mori vesh nga mediat. Ai theksoi se do të jetë ai që do t’i marrë në pyetje hetuesit.
“Sapo mësova nga mediat e regjimit, që nesër unë, lideri i Partisë së Lirisë, forcës së dytë opozitare dhe forcës së tretë politike në vend, qenkam thirrur për t’u pyetur nga organizata kriminale SPAK, e cila firmosi rrëmbimin tim të paligjshëm dhe banditesk. Pa dyshim që do jem atje për t’i marrë unë në pyetje dhe pas kësaj seance jam i hapur për çdo pyetje nga mediat që do të jenë të pranishme”, shkruhet në Facebookun e Ilir Metës.
Veç çështjes “CEZ-DIA”, Ilir Meta akuzohet nga SPAK dhe për kontratat e konsulencës dhe lobimit në Shtetet e Bashkuara të Amerikës, pastrimin e produkteve të veprës penale në blerjen e një shtëpie në Tiranë si dhe mosdeklarimin e shpenzimeve mjekësore për periudhën 2013-2019.
Ndaj Ilir Metës rëndojnë akuzat për 3 veprat penale “Korrupsioni pasiv i funksionarëve të lartë shtetërorë ose të zgjedhurve vendorë” në 3 (tre) raste nga të cilat në dy raste është kryer në bashkëpunim, “Pastrimi i produkteve të veprës penale ose veprimtarisë kriminale” e kryer në bashkëpunim dhe më shumë se një herë, dhe “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i cdo personi që ka detyrimin ligjor për deklarim”.
Vlen të theksohet fakti se ditën e djeshme u paraqit në SPAK edhe bashkëshortje e Metës, me të cilën është në proces divorci, deputetja Monika Kryemadhi, si dhe mamaja e kësaj të fundit, Fatime Kryemadhi.
