Gjykata e Posaçme e Apelit ka caktuar masën e sigurisë “detyrim paraqitje” dy herë në muaj në SPAK për kreun e PD-së, Sali Berisha në lidhje me dosjen për privatizimin e ish-kompleksit sportiv “Partizani”.
Vendimi i është marrë nga gjyqtari Ergert Pëllumbi, i cili shqyrtoi ankimimin e bërë nga dy prokurorët e SPAK, Arben Kraja dhe Enkeleda Millonai, të cilët kërkonin rikthimin e “arrestit në shtëpi” për liderin demokrat.
Ndërkohë, gjyqtari i Apelit nuk ka pranuar kërkesën e SPAK, por gjithashtu, ka prishur edhe vendimin e GJKKO-së të marrë nga gjyqtarja Flojera Davidhi më 27 Nëntor, e cila i revokoi të gjitha masat e sigurisë ndaj Berishës.
Avokati i Berishës, Genc Gjokutaj, e konsideroi si të “çuditshëm” vendimin e sotëm të Apelit, pasi sipas tij, askush nuk kishte bërë kërkesë që liderit demokrat t’i caktohej masa “detyrim paraqitje”.
“Vendimi nuk është zbardhur, por ky vendim është zgjidhja më e keq që është dhënë ndonjëherë, nuk ka zgjidhur asnjë problem, veçse ka hapur një kapitull të ri që ne sigurisht do ta ndjekim. Prokurori s’ka bërë kërkesë për masë sigurimi tjetër, ata i qëndrojnë arrestit në shtëpi. Prokurori thotë që fjalët e mia janë të drejta, thotë se zoti Berisha mund të intimidojë dëshmitarët, thotë s’kemi nisur ende gjyqin, provat formohen në gjykim, pretendime të tilla. Duhet bërë urdhri i ekzekutueshëm dhe duhet komunikuar. Duhet të shohim se çfarë do të ndodhë. Jam kurioz të di se çfarë është gatuar, do presim dhe do jemi në kontakt.
Me një vendimmarrje të çuditshme Apeli i GJKKO, mbi ankimin e prokurorisë në bazë të një vendimi të Shkallës së Parë për revokimin e masës për Berishën, vendosi kryesisht zëvendësimin e masës. Ne jemi të qartë se objekti i këtij gjykimi ishte kërkesa për shfuqizimin e vendimit të shkallës së parë. Prokurori i qëndronte masës arrest në shtëpi, nuk kishte kërkesë tjetër.
Kjo gjykatë nuk është më pak e kapur se sa Gjykata Kushtetuese, dy herë që shtyn gjyqin për shkaqe objektive, që detyrim për paraqitjeje e quan kushtetues, e cila nuk i hyri kërkesës për sqarimin e kufizimit të lirisë së një deputeti. E dini këtë sagë dhe sot gjendemi para këtij vendimi, detyrimi për tu paraqitur. Vijmë sërish në krye të herës, te kjo histori”, u shpreh Gjokutaj.
Avokati shtoi më tej se nuk e di nëse Berisha do ta respektojë vendimin për t’u paraqitur dy herë në muaj në SPAK, pasi sipas tij, kjo është një vendimarrje që i takon liderit demokrat.
Sali Berisha ndodhej në izolim që prej 30 Dhjetorit të vitit 2023, kur Gjykata e Posaçme vendosi t’i caktonte masën e sigurisë “arrest shtëpie”, pasi lideri demokrat nuk zbatoi masën e mëparshme “Detyrim paraqitje”, duke e konsideruar si antikushtetuese. Pas këtij vendimi, avokatët e Berishës kishin bërë një sërë ankimimesh për t’i revokuar masën “Arrest shtëpie”, por kërkesat e tyre ishin rrëzuar si në Shkallën e Parë, po ashtu edhe në Apelin e Posaçëm.
Ndërkohë, të hënën, më 6 Janar, gjyqtarja Flojera Davidhi do të marrë vendimin nëse çështja e dosjes “Partizani” do të dërgohet ose jo për gjykim. Ajo mund të dërgojë për gjykim dosjen, mund ta kthejë pas për plotësim hetimesh ose e pushon çështjen.
Për çështjen në fjalë Berisha është marrë i pandehur për akuzën e veprës penale “Korrupsion pasiv i funksionarëve të lartë shtetërore ose të zgjedhurve vendorë”, kryer në bashkëpunim.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij Jamarbër bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”.
