Kreu i Lëvizjes Bashkë, Arlind Qori ka reaguar në lidhje me thirrjen në SPAK të kreut të Bashkisës së Tiranës, Erion Veliaj.
Sipas Qorit, me arrestimin e Veliajt do të gëzonin të gjitha, teksa për këtë deklaratë ai përmend një sërë arsyesh. Ai shton më tej se kryebashkiaku i Tiranës e ka marrë të tatëpjetën dhe sipas tij, Veliaj është politikisht i mbaruar, madje barrë e sikletshme për padronin e tij politik dhe bashkëkeqbërësin Edi Rama.
Gjithsesi, Qori thekson se edhe pa Erion Veliajn, e keqja do të mbetet mes nesh, si korrupsioni sistemor, oligarkia mbytëse dhe bombardimi propagandistik.
Reagimi i plotë:
Nga arrestimi i Erion Veliajt do të gëzoheshin thuajse të gjithë, i madh e i vogël. Në radhë të parë sepse kemi të bëjmë me një nga politikanët më të korruptuar të dekadave të fundit, në mos më të korruptuarin.
Së dyti sepse qeverisja e tij në Tiranë është shembull se si mund të zhbëhet një qytet prej pastrimit të parave të krimit të organizuar, si mund të zhduken hapësirat publike dhe të shkatërrohet trashëgimia kulturore, si mund të mbytesh në trafik dhe të të shtypë makina nga mungesa e trotuarëve, si mund të rriten çmendurisht çmimet e shtëpive dhe qirasë pa u rritur ekonomia dhe pagat.
Së treti sepse kemi të bëjmë me një politikan boshllëku intelektual i të cilit orvatet prej vitesh të retushohet me kontroll maniakal të imazhit dhe mbështetjes televizive. Nuk ka politikan në Shqipëri që t’i jetë përvjedhur debatit dhe llogaridhënies publike më ethshëm se Erion Veliaj. Edhe seancat e Këshillit Bashkiak shërbejnë vetëm si foltore ku uzurpatori i mikrofonit shan e shpif për ata që e kritikojnë, siç ka ndodhur shpesh kur është ndeshur me kërkesën e llogarisë nga përfaqësuesja e Lëvizjes BASHKË Mirela Ruko.
Së katërti sepse ai arrin të spikasë në hipokrizi edhe në një mjedis politik ku hipokrizia është emërues i përbashkët i thuajse të gjithë aktorëve politikë. Fraza të gatshme, të cekta e të përsëritura deri në dhimbje koke, që synojnë të të bëjnë të mos u besosh syve të tu.
Së pesti sepse kemi të bëjmë me një njeri që ka hyrë dhe po del nga jeta politike si një eksperiment i madh dhe i dështuar i të pushtetshmëve. Prej fillesave të tij në Mjaft, ai ka pasur mbështetjen e plotë të një kryetari bashkie të fuqishëm dhe të korruptuar si Edi Rama, si dhe mikrofonat e çdo televizioni në çdo recitim publik me 5-6 vetë. Ishte shembulli më i keq i të resë së fabrikuar në kuzhinat e vjetra e të ndyra të korrupsionit, efektet e të cilës ndihen edhe sot e kësaj dite.
Erion Veliaj ka marrë të tatëpjetën. Politikisht është i mbaruar, madje barrë e sikletshme për padronin e tij politik dhe bashkëkeqbërësin Edi Rama. Se kur do t’i lërë shëndenë lirisë duket vetëm çështje kohe dhe përllogaritjesh politike gjithnjë e më iluzore.
Gjithsesi, edhe pa Erion Veliajn, e keqja – pjesë e rëndësishme e të cilës ka qenë prej kohësh – do të mbetet mes nesh. Korrupsioni sistemor, oligarkia mbytëse dhe bombardimi propagandistik do të vazhdojnë, me ustallarë të vjetër dhe Erionë të rinj. Nuk ka sistem drejtësie, sado mirë punoftë, që të zëvendësojë popullin në detyrën historike të shkuljes së të keqes me rrënjë dhe hapjes së shtigjeve për demokraci të njëmendtë, shtet të së drejtës dhe zhvillim të qëndrueshëm.
