Një akt ekstrem censure. Kështu e ka konsideruar kreu i PD-së, Sali Berisha mbylljen e platformës TikTok për një vit në Shqipëri nga kryeministri Edi Rama.
Përmes një video të publikuar po në TikTok, Berisha shprehet se Edi Rama vendosi ta mbyllë këtë platformë vetëm se aksionet e tij në mediat sociale kanë rënë përtokë dhe sipas tij, ai nuk e ble dot këtë platformë siç ble mediat e tjera.
Lideri demokrat shton më tej se jemi në prag të zgjedhjeve dhe sipas tij, Rama nuk toleron dot negativitetet e pasqyruara nga qytetarët në këto platforma.
“Në një akt ekstrem censure, Edi Rama informoi dje se ka vendosur të bllokojë plotësisht platformën e Tik Tok-ut. Sipas tij, ishte ky një shkak madhor i vrasjes së nxënësit në shkollë. Mirëpo, kompania e Tik Tok informoi se, as i ndjeri Martin, as dhe vrasësi i tij nuk kishin llogari në këtë platformë.
Çfarë del? Kësaj i thonë njëlloj sikur, për të mos patur aksidente, të ndalojmë përdorimin e makinave, apo të ndalojmë përdorimin e rrugëve dhe këto janë absurditete. E vërteta është se, Edi Rama vendosi ndalimin e platformës së Tik Tok-ut vetëm e vetëm se, aksionet e tij në mediat sociale kanë rënë përtokë, siç dëshmojnë të gjitha sondazhet. Së dyti, ai nuk i blen dot këto platforma, siç blen media tjera në Shqipëri. Dhe së fundmi, jemi në prag të zgjedhjeve dhe nuk toleron dot negativitetet e pasqyruara nga qytetarët në këto platforma.
Duke ju garantuar se, platforma e Tik Tok-ut do të hapet menjëherë pas zgjedhjeve, ju ftoj të dashur miq, të postoni në llogaritë tuaja të Tik Tok, por edhe rrjeteve tjera sociale, statuse në mbrojtje të kësaj platforme dhe në dënim të censorit ekstrem, narkodiktatorit Edi Rama.” – shprehet Berisha.
@prof.dr.saliberisha Ndalimi i Tik Tok, akt ekstrem censure! #sb ♬ original sound – Sali Berisha
