Këtë vit 23 sulme me eksploziv janë shënuar në Shqipëri, ku Shkodra mban vendin e parë me 12 të tilla.
Në disa prej këtyre rasteve, objektiva kanë qenë punonjës të rendit dhe të drejtësisë, si policë dhe gjyqtarë.
Kryeqyteti gjithashtu ka përjetuar ngjarje të ngjashme; në Tiranë janë regjistruar 5 shpërthime me eksploziv që kanë shkaktuar dëme materiale, por fatmirësisht pa viktima.
Nga të gjitha ngjarjet e regjistruara këtë vit, policia ka arritur të zbardhë vetëm dy raste, ndërsa për pjesën tjetër hetimet vazhdojnë dhe autorët mbeten në kërkim.
Një shpërthim i fundit ndodhi mëngjesin e kësaj të diele, kur një sasi tritoli u vendos në derën e banesës së një 52-vjeçari në lagjen “Tre Heronjtë” në Shkodër.
Kjo është hera e dytë që ndaj tij kryhet një sulm i tillë.
Më 29 gusht, ai ishte bërë objektiv i një shpërthimi tjetër, kur një sasi eksplozivi u vendos në derën e agjencisë së tij funerale pranë Spitalit të Shkodrës, raportojnë mediat në Shqipëri.
