Një përplasje është regjistruar ditën e sotme në Komisionin e Ekonomisë mes deputetit socialist Erion Braçe dhe kreut të Kontrollit të Lartë Shtetëror Arben Shehu.
Braçe u ankua për mediat se po e sulmojnë se me proprozimet e tij po tenton që mazhoranca të vendosë nën kontroll KLSH-në, duke e kthyer në një audit të brendshëm të Qeverisë. Deputeti i PS-së tha se shqetësohet kur del nëpër portale dhe se për këtë shkak kishte vendosur të mbyllte gojën.
“Po sulmohem nga media vetëm pse kam bërë disa propozime në rezolutën e KLSH-së. Si institucion KLSH nuk kapet dot nga një deputet, as nga një mazhorancë e deri tek presidenti, pasi ka një ligj të qartë. KLSH kapet vetëm nëse doni ju, jo nëse duam ne. Ka një muaj që dal në TV dhe thuhet “Erion Braçe do të kapë KLSH”. S’kam kap njeri me thënë të drejtën. Dje doli një gjë tjetër “Erion Braçe e Shalsi duan ta kthejnë KLSH-në në audit të brendshëm të qeverisë. Nuk guxojmë dot të hapim gojën. Unë kam kërkuar vetëm që KLSH të monitorojë auditin e brendshëm të qeverisë” – tha Braçe.
Kurse kreu i KLSH, Arben Shehu, iu përgjigj që “të mos shqetësohej”, por deputeti vijoi me tej duke thënë: “Si mos të shqetësohem, juve nuk ju vjen keq nëse dilni nëpër portale. Kjo që po ndodh na bën që ta qepim gojën fare. Propozimet që kam bërë nuk cenojnë pavarësinë tuaj”.
Ndërkohë, kreu i KLSH-së i doli në mbrojtje mediave duke i konsideruar si avokat i shoqërisë shqiptare, duke mbrojtur interesat e saj. Ai i tha Braçes se është e pakuptimtë që të përfshihen në një debat të tillë.
“Në çdo moment e keni mundësinë të komunikoni me mua. Dua të sqaroj se KLSH nuk asnjë lloj dashakeqësie përkundrazi në radhë të parë si deputet dhe më pas për atë që ju përfaqësoni. Nga ana jonë Braçe ka pasur mbështetje nga ne. Në lidhje me komunikime apo qëndrime të ndryshme unë kam pasur të gjitha mundësitë dhe kemi zgjedhur rrugën e komunikimit institucional.
Unë nuk jam gazetar, me profesion jam jurist. Komunikimin me mediat e vlerësoj shumë se është avokat i shoqërisë së shqiptare. Media është mbrojtës i interesave të shoqërisë. Por në lidhje me situata të tilla është e pakuptimtë që ne të përfshihemi dhe të insistojmë në këtë drejtim . Nëse do kem nevojë të bëj komunikime do përgjigjem në format që ligji me lejon.” – deklaroi kreu i KLSH-së, Arben Shehu.
