Bullgari po mban këtë të diel (27 Tetor) zgjedhjet e shtata parlamentare në 4 vitet e fundit, teksa shpresat janë të pakta për dhënien fund të ngërçit politik.
Qendrat e votimit për këto zgjedhje të parakohshme janë hapur në orën 07:00 dhe do të mbyllen në orën 20:00. Në këto zgjedhje parlamentare garojnë 22 parti dhe 9 koalicione.
Ndërkohë, në këto zgjedhje po marrin pjesë edhe bullgarët që jetojnë në Shqipëri dhe që vendi ynë i njeh si minoritet.
Më konkretisht, janë hapur qendra votimi në Kukës, Korçë, Elbasan dhe në Tiranë pranë ambasadës bullgare, teksa të drejtë votimi kanë vetëm qytetarët me letërnjoftim dhe pasaportë bullgare.
Para zgjedhjeve, një sondazh i Gallup International Balkans, që u publikua nga Radioja Kombëtare e Bullgarisë, tregoi se asnjë parti nuk pritet të fitojë shumicën në këto zgjedhje.
Partia e qendrës së djathtë e ish-kryeministrit Boyko Borisov, GERB, pritet të dalë e para me rreth 26 % të votave. Megjithatë, kjo parti me shumë gjasa do të përballet me vështirësi në gjetjen e partnerëve qeverisës, duke i hapur rrugë bisedimeve të zgjatura për formimin e një koalicioni.
Sipas sondazhit të Gallupit, partia reformiste “Ne vazhdojmë ndryshimin” do të fitojë 16.2 % të votave, ndërsa partia e ekstremit të djathtë dhe pro Kremlinit, Rilindja, pritet të fitojë 14.9 % të votave.
Bullgaria nuk ka arritur të formojë një qeveri stabile që kur vendi u përball me protesta masive kundër korrupsionit, që rrëzuan nga pushteti ekzekutivin e Borisovit më 2020. Që atëherë, gjashtë palë zgjedhjeve kanë dështuar që ta nxjerrin vendin nga ngërçi politik.
Rezultatet e zgjedhjeve të fundit, të mbajtura në qershor, ishin të paqarta dhe politikanët dështuan tri herë që të formonin një koalicion qeverisës. Po ashtu, në zgjedhjet e qershorit, pjesëmarrja në zgjedhjeve ishte vetëm 34 për qind – dalja më e ulët në Bullgarinë postkomuniste.
Në gusht, presidenti bullgar, Rumen Radev, pranoi propozimin për formimin e ekzekutivit nga kryeministri në detyrë, Dimitar Glavchev, duke mundësuar që vendi të kishte një ekzekutiv të përkohshëm.
Glavchev u emërua kryeministër në detyrë pasi Qeveria u rrëzua në mars.
