Ish-drejtues i lartë i Policisë, Shemsi Prençi ishte i ftuar në A2 CNN nga ku foli për arrestimin e dhunshëm të kreut të Partisë së Lirisë, Ilir Meta.
Momenti i arrestimit, pranë mbikalimit të Kamzës në Tiranë, është komentuar gjerësisht, ku opozita ka reaguar duke ngritur akuza ndaj policisë për mënyrën sesi e kanë nxjerrë Ilir Metën nga makina.
Prençi u shpreh se policia gaboi dhe njëkohësisht rrezikoi shumë, pasi nëse do të kishte qenë një gardist në mbrojtje të ish-presidentit rrezikohej gjakderdhja. Po ashtu, ai theksoi se policët ishin të rrezikuar edhe nga manovrim i drejtuesit të makinës së Metës.
“Nëse një gardist në mbrojtje të personalitetit të lartë shtetëror që ka në makinë do të hapte zjarr sepse ai grupi nuk do t’i dukej si grup policor, por si grup terrorist, do të ndodhte një ngjarje kriminale duke u konfrontuar me armë ose shoferi i zotit Meta, për të mbrojtur personalitetin që kishte në makinë, do të bënte manovrim para dhe mbrapa dhe do të shtypte me makinë një apo dy punonjës të policisë, atëherë do të ishte një katrahurë shumë e madhe.”, u shpreh Prençi.
