Shumica e qytetarëve nuk i besojnë informacionit që marrin nga rrjetet sociale.
Këtë konkluzion nxori raporti i fundit i Balkan Barometer 2024, sipas të cilit shumica e qytetarëve në rajon shfaqin mosbesim ndaj informacionit që marrin nga njerëzit ose grupet e miqve që ndjekin në rrjetet sociale.
Ky fakt bie ndesh me ‘modën’ e influencuesve që vitet e fundit ka qenë në rritje progresive në vendin tonë.
Sipas të dhënave të fundit në mbledhura në terren nga Monitor, influencuesit po hasin sukses me pagesa që nisin nga 50-2000 euro për një shpërndarje fotoje/informacioni.
Ndërkohë që rrjetet sociale mbeten një platformë kyçe për komunikim dhe ndarje informacioni, perceptimi i qytetarëve për saktësinë dhe besueshmërinë e këtij informacioni vazhdon të jetë problematik. Rritja e lajmeve të rreme dhe keqinformimit në këto platforma ka ndikuar negativisht në besimin e publikut dhe në përdorimin e tyre si burime të besueshme informacioni.
Nga të dhënat e përmbledhura:
- Shqipëria regjistron një prirje më të madhe besimi, ku 51% e qytetarëve kanë tendencë të besojnë informacionin e marrë nga rrjetet sociale, por vetëm 2% kanë një besim të plotë. Ndërkohë, 26% shfaqin tendencë për të mos besuar.
- Kosova ka shkallën më të lartë të mosbesimit, me 48% të qytetarëve që nuk kanë besim në informacionin e rrjeteve sociale, ndërsa vetëm 2% kanë një besim të plotë.
- Serbia, ndryshe nga vendet e tjera të rajonit, paraqet një shkallë më të ulët mosbesimi me vetëm 17%, ndërsa 46% kanë tendencë për të besuar informacionin që marrin nga rrjetet sociale.
- Në nivel rajonal, 42% e qytetarëve kanë prirje për të besuar informacionin që marrin përmes rrjeteve sociale, ndërsa 30% kanë tendencë për të mos besuar dhe 12% deklarojnë se e distancojnë plotësisht veten nga informacioni që marrin në këto platforma./Monitor
