Kreu i PD-së, Sali Berisha ka dalë ditën e sotme në një bashkëbisedim me ndjekësit e tij në rrjetet sociale, ku deklaroi se në “republikën e George Sorosit” drejt;sia u shndërrua në degë të ekzekutivit, teksa sipas tij, PD beson tek një drejtësi e pavarur.
Berisha deklaroi se me zgjedhje të lira, “partia e krimit të Edi Ramës do ndahet më keq se e njëjta parti e Ramiz Alisë në vitin 1992”, duke shtuar se do të jenë të angazhuar në një betejë pa kthim të mosbindjes civile për krijimin e një qeverie teknike
“Është e vërtetë që në republikën e Xhorxh Sorosit, jo Xhorxh Oruellit, drejtësia u shndërrua në degë të ekzekutivit. Por është e vërtetë që PD beson në një drejtësi të pavarur. Beson në një drejtësi që zbaton ligjin dhe Kushtetutën. Në këtë kontekst, ne jemi të angazhuar në një betejë pa kthim të mosbindjes civile për krijimin e një qeverie teknike në mënyrë që shqiptarët të mund të votojnë të lirë, me bindjen më të thellë se me zgjedhje të lira, partia e krimit të Edi Ramës do ndahet më keq se e njëjta parti e Ramiz Alisë në vitin 1992. Pra, është në dorën e demokratëve, të PD dhe opozitës, që në këtë betejë të rikthejë votën e lirë, të garantojë rotacionin dhe normalizimin e Shqipërisë.” – tha Berisha.
Lideri demokrat tha më tej se mosbindje civile e 7 tetorit u dëshmoi të gjithë skeptikëve në opozitë se cili është shpirti i vërtetë opozitar i qytetarëve shqiptarë.
“Mirënjohje të pakufishme popullit opozitar. Ai ajo mosbindje civile e 7 tetorit u dëshmoi të gjithë skeptikëve në opozitë se cili është shpirti i vërtetë opozitar i qytetarëve shqiptarë. Të gjithë ata që murmurisnin dhe pëshpëritnin se shqiptarët nuk ngrihen, e panë se cilët ishin shqiptarët dhe sa të gatshëm ishin. Duhet të vazhdojë menjëherë dhe sa më shpejt me 77 metoda, praktika të mosbindjes civile. Asgjë nuk na ndalon ne në realizimin e qëllimeve tona, qeverinë teknike dhe rikthimin e votës së lirë.” – tha Berisha.
