Ambicia e Shqipërisë për t’u bërë pjesë e Bashkimit Europian, sjell me vete mundësi të reja për bizneset prodhuese për t’u zgjeruar në një treg më të madh, ashtu sikurse sjell edhe sfida.
Një anketë e fundit e Sekretariatit të Këshillit të Investimeve vëren se shumica e bizneseve investojnë duke pasur si motivim kryesor për rritjen e cilësisë së produkteve zgjerimin në tregun e BE-së.
Kështu (55%) ose më shumë se një në dy kompani janë të gatshme të investojnë në cilësi për shkak të aspiratave për të eksportuar në tregun e BE-së, ndërsa një në pesë kompani nuk mund të investojë në prodhim me standardet e BE-së për shkak të kostove të lidhura. Ndërkohë, afërsisht (18%) një në pesë kompani nuk dëshiron të investojë pasi është e kënaqur me prodhimin dhe tregtimin në tregjet e brendshme.
Përmbushja e standardeve të BE-së në prodhim mbart me vete kosto të cilat duket se një pjesë e konsiderueshme e biznesit mendon se duhet të mbulohet tërësisht nga qeveria teksa një numër jo i vogël mendojnë se këto kosto mund të ndahen mes dy palëve. Për Sekretariatin treguesi se shumica e bizneseve presin që kjo kosto të mbulohet nga qeveria tregon për mungesë motivimi mes tyre për të përmbushur përgjegjësitë dhe për të mbetur konkurrues.
“Kompanitë janë të ndara në çështjen e kostove për përmbushjen e standardeve dhe rregulloreve të brendshme të BE-së. Një në dy kompani beson se qeveria duhet të financojë të gjithë procesin, ndërsa gjysma tjetër është e gatshme të ndajë kostot në mënyrë të barabartë. Duhet theksuar se, në parim, përgjegjësia për certifikimin dhe sigurimin e pajtueshmërisë së produktit me kërkesat ligjore i takon prodhuesit dhe jo shtetit.
Fakti që 49% e kompanive presin që shteti të mbulojë plotësisht kostot e pajtueshmërisë së produktit mund të tregojë mungesë motivimi midis bizneseve për të përmbushur përgjegjësitë e tyre dhe për të mbetur konkurrues. Shteti mund ta mbështesë këtë proces duke ofruar trajnime ose duke ofruar stimuj fiskalë të justifikuar mirë në përputhje me legjislacionin për ndihmën shtetërore që mbështet konkurrencën e ndershme” thuhet në publikim.
I njëjti publikim ka identifikuar gjithashtu disa nga masat kryesore mbështetëse që mund të merren për të inkurajuar kompanitë që të prodhojnë dhe tregojnë në përputhje me standardet.
“Mbështetja financiare për pajisjet dhe teknologjinë, thjeshtimi i procedurave për marrjen e certifikatave dhe programet e edukimit dhe trajnimit mbi standardet janë identifikuar si masat kryesore mbështetëse në të cilat qeveria duhet të investojë për të inkurajuar kompanitë të prodhojnë dhe tregtojnë në përputhje me standardet” thuhet në publikim./ MONITOR
