Është arrestuar nga policia i riu që shkaktoi aksidentin me 4 të plagosur mbrëmjen e djeshme në zonën e Lungomares në qytetin e Vlorës.
Policia bë me dije se 31-vjeçari aksidentoi 4 persona që po ecnin te vijat e bardha. Dy nga të aksidentuarit janë fëmijë të mitur, që ishin duke kaluar rrugën bashkë me nënë e tyre.
“Sektori i Policisë Rrugore në DVP Vlorë arrestoi shtetasin A. Ll., 31 vjeç, banues në Vlorë, pasi mbrëmjen e djeshme në zonën e Lungomares, duke drejtuar automjetin tip “Volksëagen”, ka aksidentuar në vijat e bardha shtetaset V. V., 50 vjeçe, I. Sh., 32 vjeçe, si dhe dy fëmijët e saj të mitur. Të katërt shtetaset ndodhen në spital, jashtë rrezikut për jetën”, njoftoi Policia.
Ndëra në pranga ka përfunduar edhe një 37-vjeçar, pasi lëvizte me automjet, duke thyer masën e sigurisë “Arrest në shtëpi” të vendosur nga Gjykata e Shkallës së Parë të Juridiksionit të Përgjithshëm Vlorë.
“Stacioni i Policisë Orikum arrestoi shtetasin A. H., 37 vjeç, banues në Orikum, pasi është konstatuar nga shërbimet e Njësisë Operacionale të Policisë Rrugore, në lëvizje me automjet, duke thyer masën e sigurisë “Arrest në shtëpi” të vendosur nga Gjykata e Shkallës së Parë të Juridiksionit të Përgjithshëm Vlorë”, njofton policia.
