Deputeti Ervin Salianji u dënua dy ditë më parë nga Gjykata e Apelit për shkak se i prishi imazhin Qeverisë duke denoncuar Geron Xhafajn, vëllain trafikant droge të ish-ministrit Fatmir Xhafaj, teksa tashmë i ka kaluar 24 orë në burgun e Fierit.
Salianji dhe avokatët e tij e konsiderojnë këtë vendim si hakmarrje të kryeministrit Edi Rama dhe Fatmir Xhafajt, si dhe të pabazuar në prova dhe në ligj.
Po ashtu, i këtij mendimi është edhe gazetari Lavdrim Lita, sipas të cilit, vepra penale mbi të cilën u dënua Salianji nuk gjen bazë ligjore. Ai sjell në vëmendjen vendimin e Gjykatës së Lartë rreth tre muaj më parë për rastin e ish-luftëtarit të UÇK-së Dritan Goxhaj, e cila është shprehur qartë se “denoncimi publik nuk është kallëzim i rremë”..
Prokuroria e Tiranës e çoi në burg Dritan Goxhajn dhe u frenua vetëm një hap larg ekstradimit, kur Gjykata e Lartë mori në dorë dosjen dhe Kolegji u shpreh qartë se deklarimet e tij publike në media për gjyqin e UÇK në Hagë nuk përbënin kallëzim të rremë.
“Deputeti Ervin Salianji është në burg për kallëzim të rremë. Gjyqtarët e Apelit nuk e kanë parë të arsyeshme të konsultohen me vendimin e Gjykatës së Lartë, në çështjen me nr 70003-00305-00-2024, të datës 9 korrik 2024, mbi pretendimin e Prokurorisë për kallzim të rremë (neni 312 kodi penal) të z. Dritan Goxhaj, i cili nga një tv kishte pretendime mbi gjyqin e UÇK në Hagë. Në arsyetimin e gjyqtarëve Ilir Panda, Sokol Binaj dhe Sandër Simoni, në Rrethanat e çështjes pika 51, 56, 58 dhe 59 thuhet se denoncimi publik nuk është kallzim i rremë”, shkruan gazetari në rrjetet sociae.
“51. Kolegji vlerëson se, vlerësimi i fjalës së shkruar si të mjaftueshme për tu konsideruar inkriminuese ndaj një shtetasi, nuk është karakteristikë e një shoqërie demokratike dhe përgjithësisht bie ndesh me të drejtat themelore të një shtetasi dhe nenit 10 të Konventës Evropiane për të Drejtat e Njeriut (KEDNJ)”, – thuhej ndër të tjera në vendimin e Gjykatës së Lartë, për rastin Goxhaj.
Edhe përse vendimet e Gjykatës së Lartë janë përfundimtare dhe mund të konsultohen nga gjyqtarët e shkallëve të tjera të drejtësisë kur kanë raste të ngjashme, tre gjyqtarët e Apelit nuk e panë të arsyeshme të shihnin çështjen nr.70003-00305-00-2024.
Por të mbetet për t’u parë nëse Gjykata e Lartë do të ketë sërish të njëjtin mendim, kur të shqyrtojnë ankimimin e Ervin Salianjit.
