Ideja e shpalosur në një intervistë për New York Times nga kryeministri Edi Rama për krijimin në Tiranë të një shteti Bektashi sipas modelit të Vatikanin, ka krijuar një stuhi të fortë reagimesh pro dhe kundër.
Shteti i ri do të mbajë emrin “Shteti Sovran i Rendit të Bektashinjve” dhe plani fillestar parashikon se do të ketë një qeveri të veçantë, pasaporta dhe kufij. Ai do shtrihet në anën lindore të Tiranës ku ndodhet edhe Kryegjyshata Botërore e Bektashinjve dhe do të bëhet shteti më i vogël në botë, me shumë gjasë i drejtuar nga Baba Mondi.
Kundër krijimit të këtij shtetit është rreshtuar ish-kryebashkiaku i zgjedhur i Himarës, Fredi Beleri, i cili në cilësinë e eurodeputetit të Demokracisë së Re, e ka denoncuar në Bruksel idenë e Ramës.
Beleri i ka drejtuar disa pyetje Komisionit Parlamentar të Stabilizim Asociimit të Bashkimit Evropian, duke kërkuar të dijë nëse krijimi i shtetit Bektashi do të ndikojë në procesin e anëtarësimit të Shqipërisë në BE.
Beleri kërkon po ashtu të mësojë nga KE se cilat do të jenë veprimet diplomatike që do të ndërmarrë, për të siguruar bashkëjetesën paqësore të të gjitha komuniteteve fetare në Shqipëri.
“Planet e Shqipërisë për të krijuar një shtet sovran fetar mysliman në Tiranë u njoftuan të dielën (22/09) nga foltorja e Asamblesë së Përgjithshme të Kombeve të Bashkuara nga kryeministri i Shqipërisë, Edi Rama. Sipas asaj që dihet deri më tani, shteti autonom dhe i pavarur do të quhet “Shteti Sovran i Urdhrit Bektashi”, ndërsa do të ketë dokumentet e veta diplomatike, kufijtë dhe një strukturë administrative më vete. Në shtetin e ri (brenda shtetit shqiptar) do të natyralizohen vetëm myslimanët shiitë, anëtarë të komunitetit fetar sufi”, shkruan Beleri në hyrje të ankesës që i drejton Komisionit Europian.
Pyetjet e Belerit drejtuar KE:
-Cili është qëndrimi i Komisionit për këtë shtet potencialit dhe a i shkel krijimi i tij kushtet e dakorduara për procesin e anëtarësimit të Shqipërisë? Nëse po, çfarë kriteresh shtesë mund të vendosen?
-A është krijimi i një shteti të tillë pa zgjedhje në përputhje me kriteret politike të Kopenhagës që duhet të përmbushë çdo vend për funksionimin e institucioneve që garantojnë demokracinë, shtetin ligjor, të drejtat e njeriut, respektimin dhe mbrojtjen e pakicave?
-Çfarë lëvizjesh diplomatike synon të bëjë Komisioni për të siguruar bashkëjetesën paqësore të të gjitha komuniteteve fetare në Shqipëri?
