Një aksident i rëndë me dy viktima ka ndodhur gjatë mëngjesit të sotëm në vendin e quajtur “Rruga e drejtë e Kuçovës” në Berat, ku një automjet ka përplasur një mjet bujqësor ku udhëtonin tre anëtarët e një familje.
Si pasojë e përplasjes, kanë humbur jetën burrë e grua, të identifikuar si shtetasit Ahmet dhe Salushe Kafazi të cilët udhëtonin me mjetin bujqësor, ndërsa vajza e tyre, Feruze Braushi, ka përfunduar në spital ku po merr ndihmë mjekësore.
Ndërsa policia thekson se drejtuesi i automjetit është shoqëruar në Komisariat, për veprime të mëtejshme procedurale.
Njoftimi i policisë:
Berat/Informacion paraprak
Rreth orës 06:00, në vendin e quajtur “Rruga e drejtë e Kuçovës”, automjeti me drejtues shtetasin A. K. është përplasur me mjetin bujqësor (frezë dore), në të cilën ndodheshin drejtuesi, shtetasi A. K., 81 vjeç, bashkëshortja e tij shtetasja S. K., 77 vjeçe dhe vajza e tyre, shtetasja F. B., 58 vjeçe.
Si pasojë e aksidentit, drejtuesi i mjetit bujqësor, shtetasi A. K., dhe bashkëshortja e tij, shtetasja F. K., kanë humbur jetën në vendngjarje, ndërsa shtetasja F. B. ndodhet në spital, jashtë rrezikut për jetën.
Drejtuesi i automjetit është shoqëruar në Komisariat, për veprime të mëtejshme procedurale.
Grupi hetimor ndodhet në vendngjarje dhe po punon për sqarimin e rrethanave dhe shkakut të aksidentit.
