Teksa punimet vazhdojnë prej më shumë se një dekade dhe afatet shtyhen çdo vit, projekti i Unazës së Madhe të Tiranës vazhdon të “thithë” para nga buxheti i shtetit.
Për të përfunduar loti 2 i kësaj, rruge, që përfshin segmentin nga sheshi Shqiponja te Bulevardi i Ri, do të kërkojë fonde shtesë.
SCAN raporton se Autoriteti Rrugor Shqiptar parashikon të hapë tenderin, me fond limit prej 167 milionë lekësh, teksa ka bërë gati procedurën e prokurimit publik.
Sipas të dhënave të fundit, të publikuara në muajin maj, loti 2 ishte në fazë të avancuar të punimeve, me 93% të volumit të punës të përfunduar.
Ndërkaq, në lotet e tjerë 4, 5, 6 dhe 7 ku punohet aktualisht ecuria e punës varionte nga 36 -65%. Segmenti fillon në afërsi të Shkozës, duke zbritur në faqen veriore të Kodrës së Priftit, drejt zonës së Kinostudios. Më pas vazhdon drejt veriut, zbret drejt lumit të Tiranës e më pas bëhet bashkimi me segmentin Babrru – Bregu i Lumit – Kthesa Kamëz. Ndërtimi i këtyre lot-eve do të shënojë dhe bashkimin me segmentet e përfunduar tashmë.
Me një gjatësi prej rreth 28,77 kilometrash, kostoja e Unazës së Madhe të Tiranës ka shkuar mbi 430 milionë euro që financohet nga buxheti i shtetit dhe mesatarisht 1 km rrugë po bëhet me 15 milionë euro.
2.8 kilometrat e para të Unazës së jashtme të Tiranës datojnë që në Qeverisjen e Sali Berishës, teksa pas përfundimit të tyre, kalvari i premtimeve për këtë projekt do të merrte më shumë se një dekadë.
Me ardhjen në pushtet të Partisë Socialiste në 2013-ën, projekti u rishikua, pasi sipas tyre nuk ishin marrë në konsideratë efektet që shkakton ndërtimi i tij në terren.
Në shtator të vitit 2021, Ministrja e Infrastrukturës dhe Energjisë, Belinda Balluku u shpreh se Unaza e Madhe e Tiranës do të përfundonte brenda 24 muajsh, pra në gusht të vitit 2023, por që si shumë tjetër rezultoi një premtim i pa mbajtur.
Ndërkohë në vitin 2023, Ervis Berberi, ish-drejtues i Autoritetit Rrugor Shqiptar i cili ka përfunduar në burg me urdhër të SPAK, tha se Unaza do të përfundonte në vitin 2024.
Pak kohë më parë, autoritetet deklaruan se Unaza e Madhe e Tiranës do të përfundojë në datën 31 dhjetor të këtij viti dhe mbetet për t’u parë nëse a do të shkelen sërish afatet apo jo.
