Autoriteti Rrugor Shqiptar ka njoftuar se ditën e sotme, do të kryhet një shpërthim i kontrolluar me sasi të vogla eksplozivi në kuadër të punimeve për ndërtimin e Bypass-it të Sarandës.
Sipas ARRSH-së, shpërthimi do të zhvillohet në intervalin kohor 09:00–10:00, pranë fshatit Shën Vasil, në afërsi të guroreve Volloder, dhe është pjesë e punimeve për hapjen e trasesë së rrugës.
Gjatë këtij intervali kohor do të ketë kufizim të qarkullimit të mjeteve.
“Ditën e nesërme, më 06.07.2026, duke filluar nga ora 09:00 deri në orën 10:00, në kuadër të punimeve për ndërtimin e Bypass-it të Sarandës, pranë fshatit Shën Vasil (në afërsi të guroreve Volloder), do të kryhet një shpërthim i kontrolluar me sasi të vogla eksplozivi, në funksion të hapjes së trasesë së rrugës.
Procesi i punës është koordinuar me strukturat e Policisë së Shtetit, të cilat do të marrin masat e nevojshme për menaxhimin e trafikut dhe garantimin e sigurisë së qarkullimit gjatë zhvillimit të punimeve.
Kërkojmë mirëkuptimin e qytetarëve dhe drejtuesve të mjeteve deri në përfundimin e plotë të këtij procesi pune”, thuhet në njoftim.
