Kryetari i Partisë Demokratike, Sali Berisha u shpreh se tubimi te ‘Rruga e Shpresës’ është një thirrje për çdo shqiptar që të protestojë për një shoqëri të lirë.
Lideri i opozitës u shpreh se regjimi ka krijuar mekanizma kriminale, antiligjore për të kontrolluar vullnetin dhe çdo rezultat elektoral.
‘Kjo protestë është thirrje për çdo shqiptar të ngrihet në mbrojtje të kësaj të vërtete themelore, për një shoqëri të lirë’, theksoi Berisha në fjalën para mbështetësve të tij.
Fjala e Berishës:
Të dashur miq!
Zgjedhjet në mëngjes fillonin me daulle, në darkë me rezultat 99 për qind. Gjatë ditës së zgjedhjeve nuk kishte as edhe një incident. Po në zgjedhje kishte dhoma të fshehta, por njerëzit edhe në fshehtësi e jepnin votën, në kundërshtim të plotë me mendjen dhe zemrën e tyre, e jepnin votën për të keqen, sepse e dinin se ajo kontrollon në çdo qelizë ata.
Atëherë Shqipëria nuk pranonte vëzhguesit e OSBE-së, por sot ata vijnë, vëzhgojnë, vrojtojnë dhe damkosin. Deklarojnë se shteti elektoral kontrollon plotësisht vullnetin e qytetarëve, e megjithë këtë, megjithë eliminim e institucionit të defakto të votës, përsëri diktatura vazhdon.
Të krijohet përshtypja se sot, ngjashëm me vitet ’90, kur Ramiz Alinë përpiqeshin të na e servirnin si Gorbaçovin e Ballkanit, Edi Ramën të na thonë, mbajeni se mirë e keni.
Por ky nuk është mendimi juaj, ky është mendimi i atyre që nuk njohin këtë komb, por është mendim edhe i armiqve të kombit shqiptar.
Ndaj dhe kjo protestë para së gjithash dhe mbi të gjitha është protestë për votën e lirë.
Kjo protestë është protestë për dinjitetin e çdo qytetari. Nuk ka dinjitet pa lirinë e votës.
Kjo protestë është protestë për shpresën dhe të ardhmen. Nuk ka shpresë dhe të ardhme në këtë vend, pa votën e lirë.
U grabit vota dhe shqiptarët ja mbathin nga vendi i tyre, si nga një mënxyrë e hatashme, si kurrë në historinë e tyre.
Kjo protestë është thirrje për çdo shqiptar të ngrihet në mbrojtje të kësaj të vërtete themelore për një shoqëri të lirë.
