Kreu i Partisë Demokratike, Sali Berisha përmes një postimi në rrjetet sociale ka bërë me dije se ditën e nesërme Qeveria do të inagurojë portin e ri të Karpenit në Kavajë.
Projekti i portit kap një vlerë prej 5 miliardë dollarësh, teksa sipas Berishës, porti do të mbajë emrin “Edi Rama”.
“Në Karpen inagurohet nesër porti 5 miliardë dollar që do mbajë emrin “Edi Rama”. Porti u ndërtua nga kompania “Star Bridge” me kapital 100 paund!”, shkruan Berisha.
Kujtojmë se një kompani e vogël nga Britania e Madhe e quajtur “Star Bridge Port Developments Limited” dha një projekt-ide për të ndërtuar në Karpen të Kavajës një port me vlerë 5 miliardë dollarë. Kompania kishte një kapital prej vetëm 100 paundësh britanikë. Një gjë e tillë ngriti dyshimet në opinion publik se projekti nuk ishte serioz.
Projekti quhej “Morgan” dhe parashikonte ndërtimin e një porti të ri gjigand në Karpen. Porti do të shoqërohej edhe nga një TEC i madh me gaz dhe një stacion rigazifikimi.
Në 21 korrik të vitit 2016 projektligji me procedurë të përshpejtuar shkoi në Parlamentin e Shqipërisë për votim. Me këtë projektligj qeveria kërkonte miratimin për një procedurë “të veçantë” për negociatat me kompaninë britanike për portin e Karpenit.
Nga investigimet e mediave në atë kohë, të dhënat treguan se pas projektit “Morgan” qëndronte kompani guackë dhe një rrjet personash, që më shumë se investitorë duket të jenë agjentë dhe “këshilltarë”.
Star Bridge Port Developments Limited është një kompani me kapital të nënshkruar prej 100 paundësh britanik, me adresë në një zyrë kontabiliteti të quajtur Blair Shepherd në qytetin Altricham në Britani, pranë Mançesterit.
Kjo kompani është regjistruar fillimisht në vitin 2011 me emrin UK Land Investments LTD, nën pronësinë e dy aksionerëve, William Becket dhe Mark Edwards. Duke u bazuar tek numri i lartë i kompanive ku shërbejnë si drejtorë ose aksionerë, Edwards and Beckett ka shumë mundësi të kenë qenë agjentë regjistrimi kompanish guackë.
Në Prill të vitit 2014, kompania ka ndryshuar emrin nga UK Land Investments në Star Bridge Port Developments Limited, ndërsa nga viti 2013 deri në vitin 2015 ajo ka pasur status regjistrimi të fjetur.
Përpara se projekt-propozimi i “Star Bridge” të dërgohej për miratim në parlamentin shqiptar, aksionet e saj janë shitur një kompanie në Singapor, të quajtur One Gate Asia PTE.
Partia Demokratike ngriti dyshime në atë kohë mbi kapacitetin financiar të Star Bridge Port Developments Limited për të ndërmarrë investimin e propozuar në portin e Karpenit, si dhe mbi shitjen e aksioneve të saj në prag të paraqitjes së projektit.
