Gjykata e Posaçme e Apelit ka lënë në fuqi masat e sigurisë për Ilir Beqaj dhe 6 të akuzuarit e tjerë në lidhje me abuzimin me fondet e Bashkimit Europian gjatë kohës që ish-ministri drejtonte Agjencinë Shtetërore të Programimit Strategjik dhe Koordinimit të Ndihmës (SASPAC).
Më konkretisht masën “arrest me burg” për ish-drejtuesin e SASPAC, Ilir Beqaj dhe për ish-koordinatorin e projektit EUSAIR, Ermal Kurtulaj. Masën “arrest në shtëpi” për Elton Marinin, menaxher futbollistesh dhe ortak i shoqërisë private dhe Alfred Nikollaj, drejtori Administrativ i “Landëays International”.
Po ashtu, janë lënë në fuqi dhe masat “detyrim paraqitje” për pronarin e “Landways International”, Gazmend Haxhia, Bledar Lekan dhe konsulenten financiare Bjona Zijaj.
Ndërkohë, është ndryshuar masa për shtetasen M. J., për të cilën është caktuar masa “Detyrimi për tu paraqitur në policinë gjyqësore”. Sipas vendimit të Apelit, shtetasja M. J. duhet të paraqitet përpara oficerit të policisë gjyqësore Samet Gurguri, pranë Byrosë Kombëtare të Hetimit, të hënën e parë dhe të tretë të çdo muaji, ora 12:00. Vendimi është marrë nga gjyqtari Engert Pëllumbi.
Ilir Beqaj kishte kërkuar lirimin nga burgu ndrejt garancisë prej 5 milionë lekëve. Avokati pretendoi se ish-ministri Beqaj nuk përbën rrezik arratie apo shoqërore, për të prishur provat dhe penguar prokurorët, por kjo kërkesë nuk është pranuar nga Apeli
Ilir Beqaj u arrestua në fillim të muajit korrik me urdhër të SPAK, pasi dyshohet se përmes njerëzve të besuar ka ndërtuar një skemë për të përfituar shuma të mëdha parash duke lëshuar fatura fiktive për shërbime të pakryera, të lëshuara nga biznese të ndryshme në Tiranë.
Gjithashtu, ai akuzohet edhe për fshehje pasurie, pasi dyshohet se është pronari “faktik” i restorantit “Gzona” tek Kalaja e Tiranës, si dhe i një automjeti që e ka në emër të bashkëpunëtorit të tij, po ashtu në burg, Ermal Kurtulaj.
Ilir Beqaj është nën hetim nga SPAK për “shpërdorim detyre” edhe në lidhje me koncesionin abuziv të sterilizimit, gjatë kohës që drejtonte Ministrinë e Shëndetësisë.
