Mes kontestimesh, Vangjel Tavo fitoi garën në zgjedhjet e pjesshme lokale të Bashkisë së Himarës.
Tavo mori mbi 1400 vota më shumë se kandidati i opozitës Petro Gjikuria. Por detaji që ra në sy ishte rezultati i disa kutive në fshatrat e zonës së Vlorës, që janë nën administrim nga Bashkia Himarë dhe që i kanë dhënë avantazh të ndjeshëm socialistit Tavo.
Sipas shifrave zyrtare nga Komisioni i Numërimit Himarë, por edhe KQZ në grafikët sqarues, bie në sy se socialisti ka marrë bindshëm vota në Lumin e Vlorës, pikërisht në fshatrat Tërbaç, Vranisht, Bolenë e Kuç.
Më e veçanta ka qenë ajo e kutisë 4589, në fshatin Tërbaç, ku pas numërimit rezultoi se Tavo mori 330 vota, kurse rivali i tij Gjikuria vetëm 7 vota, teksa 3 prej tyre supozohet se ishin votat e komisionerëve të opozitës. E përkthyer në shifra elektorale, në këtë qendër Tavo ka fituar me 98,3% e votave, rast gati i paprecedentë në zgjedhje.
Në total sipas KQZ, Tavo ka marrë 5.022 vota përballë rivalit të tij, Petro Gjikuria, i cili ka marrë 3.545 vota. Siç paraqesin dhe shifrat e KQZ-së, nga 36 kuti, Tavo ka fituar me 58.62 % të votave, kurse Gjikuria pak më shumë se 41%.
Opozita në krahun tjetër ka kontestuar procesin zgjedhor duke evidentuar dy problematika shqetësuese: Administrata në terren dhe skadimi i kartave ID. Sipas eksponentëve të opozitës, qeveria përdori të gjitha resurset shtetërore për të ndikuar në vota, kurse qindra qytetarë nuk ushtruan të drejtën e votës për shkak se u kishte skaduar karata ID.
