Janë zbardhur detaje të reja nga ngjarja e regjistruar natën e kaluar në Shkodër, ku një person qëlloi me armë zjarri drejt disa personave të tjerë në afërsi të bustit të Prekë Calit.
Autori i dyshuar është Viktor Marku, i cili është shoqëruar nga Policia e Shkodrës bashkë me të vëllain dhe djalin e xhaxhait.
Nga të shtëna nuk ka patur persona të plagosur, pasi “shënjestrat” janë larguar me shpejtësi duke i shpëtuar plumbave. Policia ka sekuestruar një automjet tip “BMW”, brenda së cilës është gjetur dhe një gëzhojë.
Viktor Marku nuk është një emër i panjohur për drejtësinë, pasi më herët ai është arrestuar si autori i dyshuar i vrasjes së Hekuran Billës, ngjarje kjo e ndodhur më 11 qershor 2020 në zonën e Komunës së Parisit në Tiranë.
Në lidhje me këtë ngjarje, më 18 Qershor të atij viti u arrestua 26-vjeçari Sebastiano Mali, i dyshuar nga policia si bashkëpunëtor në vrasjen e 40-vjeçarit. Sebastiano Mali është nipi i Prel Markut, ekzekutuar në Angli vite më parë nga Hekuran Billa.
Ndërsa tre ditë më pas, u arrestua edhe daja i Sebastian Malit, Viktor Marku, i cili u kap nga policia malazeze në pikën e kalimit kufitar Hani i Hotit. Hekuran Billa dyshohet se u nxorr nga Adiola Lakra, po ashtu e arrestuar në atë kohë si bashkëpunëtore në krim.
Por, të tre emrat e mësipërm u liruan dhe sot vrasja e Hekuran Billës është ende pa autor. Kjo pasi prokurori i çështjes, Petrit Hysi, vendosi të pushonte akuzat për vrasjen e Hekuran Billës për personat e arrestuar, Viktor Marku, nipit të tij Sebastian Mali dhe të dashurës së këtij të fundit, Adiola Lakrën si dhe Gjekson Pusin.
Pas më shumë se një viti hetime, prokurori Hysi thotë se nuk ka prova të mjaftueshme që të vërtetojnë implikimin e tre personave të proceduar në vrasjen e Hekuran Billës.
Vrasja e Hekuran Billës, sipas policisë në atë kohë, ndodhi për shkak të hakmarrjes, pasi Billa në vitin 2006 në Angli ka vrarë vëllanë e Viktor Markut, Prel Markun.
Hekuran Billa qëlloi Prel Markun, 22 vjeç, në kokë në një klub natë në “Park Royal” të Londrës më 14 tetor 2006. Ai u shpall fajtor në Angli për tre akuza për vrasje në tentativë dhe vrasje të Prel Markut, dhe u dënua me burgim të përjetshëm, me një mandat minimal të rekomanduar prej 34 vjet.
Ky vendim u njoh nga gjykatat shqiptare, të cilat vendosën ta dënojnë Billën e deportuar në Shqipëri me 25 vite burgim. Një pjesë të dënimit Billa e vuajti në burgun e Fushë-Krujës, ku më pas mundi të përfitojë lirinë me kusht pas një vendimi të firmosur nga gjyqtarja Enkelejda Hoxha.
Pas daljes nga burgu Billa lëvizte lirshëm, ç’ka solli dhe nisjen e planeve të kundërshtarëve të tij për ta ekzekutuar.
