Deputetja e Partisë Demokratike, Jorida Tabaku ka reaguar në lidhje me mos kthimin e lekëve nga Qeveria ndaj profesionistëve të lirë, pas vendimit të Gjykatës Kushtetuese që shfuqizoi ligjin duke e konsideruar si të padrejtë.
Në një postim në rrjetet sociale, Tabaku shkruan se gjatë kohës që ligji shqyrtohej në Kushtetuese, profesionistëve të lirë u janë marrë nga Qeveria rreth 10 milionë euro të ardhura, përmes këtij tatimi të padrejtë.
Ajo thekson se të ardhurat janë mbledhur nga një taksë e pandershme dhe antikushtetuese dhe se duhen nisur menjëherë procedurat për t’ia rikthyer këto 10 milionë euro shtresës së mesme.
Reagimi i plotë i Jorida Tabakut:
Gjykata Kushtetuese ka marrë një vendim të qartë në lidhje me Taksën antikushtetuese ndaj Profesioneve të Lira. E ka rrëzuar atë!
Mirëpo edhe pse çështja ishte në Gjykatë dhe po shqyrtohej prej saj, qeveria socialiste vazhdonte të dërgonte njoftime Profesionistëve të Lirë për të paguar taksën antikushtetuese dhe atyre që guxonin të mos paguanin pasi po prisnin vendimin e Gjykatës, qeveria socialiste i përmendte kërbaçin e ndëshkimit për një taksë të pandershme që më vonë u rrëzua.
Sot, janë rreth 10 mijë biznese që kanë paguar një taksë që nuk duhej ta paguanin. Buxheti i shtetit ka grumbulluar mbi 10 mln euro të ardhura nga 10 mijë profesionistë të lirë.
Qartësisht këto të ardhura janë mbledhur nga një taksë e pandershme dhe antikushtetuese. Qeveria do të duhet që të nisë menjëherë procedurat për t’ia rikthyer këto 10 mln euro shtresës së mesme së cilës i është marrë në kundërshtim me Kushtetutën.
Vendimi i Gjykatës Kushtetuese është final, i padiskutueshëm. Qeveria shqiptare ka vetëm detyrën që të zbatojë këtë vendim! Nuk mundet në një shtet të së drejtës, në një demokraci perëndimore të vihen më diskutim vendimet e asnjë gjykate për më tepër asaj kushtetuese.
10 mln euro nuk janë kurrgjë për arkën e shtetit por janë shumëçka për xhepin e shtresës së mesme që është shtylla kurrizore e vendit tonë. Atyre u duhet kthyer ajo që është marrë padrejtësisht dhe pandershmërisht! Vetë nuk e bënë dot kurrë mbështetjen për shtresën e mesme, të paktën të zbatojnë vendimin e gjykatës.
