Skënderbeu-Tirana është një nga përballjet në Shqipëri që ka prodhuar gjithnjë agresivitet prej më shumë se një dekade si fushën e lojës, po ashtu edhe në tribuna.
Këto dy ekipe u përballën ditën e djeshme në një ndeshje miqësore të luajtur në Korçë, por nga ajo çfarë prodhoi në fushë, vetëm e tillë nuk mund të quhej.
Deri në minutën e ’73 të takimit, dukej se gjithçka po shkonte në normalitet, por në këtë moment ndodhi dhe “shkëndija” që ndezi gjithçka. Shkak u bë një përplasje mes mbrojtësit të Tiranës Gledi Mici dhe mesfushorit të Skënderbeut, Mario Rabiu, pas ndërhyrjeve të ashpra nga ky i fundit.
Konfrontimi mes dy futbollistëve në fjalë vijoi për disa çaste, ku ofendimet u bënë aq të forta mes Micit dhe Rabiut, sa që arbitri kryesor u detyrua t’i nxirrte nga fusha me kartonin e kuq. Pas këtij momenti gjithçka u përshkallëzua.
Në kohën kur Rabiu po i drejtohej tunelit për të shkuar te dhomat e zhveshjes një pjesëtar i stafit teknik të Tiranës i afrohet, duke i kërkuar llogari për sjelljen e tij në fushë. Ofendimet arritën përmasa të pallogaritshme, aq sa të dy pankinat, siç shihet edhe në videon e mëposhtme të publikuar nga mediat lokale, u përfshinë në një sherr masiv.
Në fushë u futën edhe disa tifozë, teksa kishte dhe nga ata që gjuanin me shishe uji apo me stola nga tribuna. Falë ndërhyrjes në kohë të trajnerëve respektivë dhe stafit teknik të Skënderbeut u bë normalizimi i situatës, teksa Gentian Liçi ishte ai që mori me vete Micin për ta qetësuar, në mënyrë që të mos acaronte më shumë situatën. Ndeshja u ndërpre për disa minuta.
Ndërkohë, për minutat në vazhdim, tifozët e Skënderbeut nuk i kanë ndalur ofendimet ndaj ish-futbollistit të tyre Gledi Mici, pavarësisht tentativës së trajnerit të Tiranës, korçarit Bledi Shkëmbi, apo drejtorit sportiv të Skënderbeut Ardi Gjançi për t’i qetësuar.
Sa i përket rezultatit, Skënderbeu dominoi pjesën më të madhe të lojës, duke gjetur edhe dy herë rrugën e rrjetës në pjesën e parë të lojës me Bismark dhe Nikaj, ndërsa Tirana shënoi dy herë pas minutës së ’80 me Ndreca dhe Ismajli, edhe për shkak të ndërrimeve të shumta, duke bërë që takimi të mbyllej me rezultatin 2-2.
