Ditën e djeshme u mbajt Kongresi Zgjedhor i Partisë Socialiste, ku kryeministri Edi Rama propozoi ndryshime në Qeveri dhe në Kuvend.
Këto ndryshime u panë si një forcim i Belinda Ballukut në luftën e brendshme brenda socialistëve, pasi tre ministrat e rinj të emëruar aktualisht mbajnë poste drejtorësh në institucione në varësi të saj.
Gjithsesi, pavarësisht forcimit të Ballukut, kryebashkiaku i Tiranës Erion Veliaj nuk e ndali servilizmin ndaj shefit të tij. Siç shihet edhe në foton e mëposhtme, Veliaj ka pritur deri në fund, kur salla e Kongreseve është pothuajse e boshatisur totalisht për të bërë një foto me kryeministrin Edi Rama.
Veliaj shfaqet duke shtrënguar dorën me Ramën, teksa pranë tyre shfaqet dhe kryebashkiaku i Kamzës, Rakip Suli. Këtë fotografi, Veliaj e ka vënë të parën në albumin e tij të postuar në rrjetet sociale me fotot nga Kongresi i PS-së, teksa krahas tyre shkruan: “Mbyllëm një ditë fantastike sot, si përgatitje për fitoren e madhe të Edi Ramës dhe Partisë Socialiste në 2025”.
Ndërkohë, në mbi dy orë fjalim që Edi Rama mbajti ditën e djeshme në Kongresin e PS-së, kryebashkiakun Erion Veliaj e përmendi vetëm dhe ajo kishte lidhje me varret dhe varrezat.
“Majko do dëshmojë përpara gjeneratës X që e ka thënë dikur njëri nga ata, më duket se ishte Edi Rama se kushedi se sa nga ata do ketë përcjellë në Sharrë apo në Tufinë se është edhe mik me lali Erin dhe ia gjen varret aty ku do.”, u shpreh Rama.
