Policia shqiptare në bashkpëpunim me autoritetet policore të Malit të Zi kanë ekzekutuar operacionin ndërkombëtar të koduar “Kidnapping”.
Bëhet fjalë për lirimin e 11 refugjatëve arabë, të cilët ishin marrë peng dhe dhunuar nga disa afganë, po ashtu refugjatë ilegalë, në një territor malor në Mal të Zi, nën kërcënimin e armëve, dhe u kërkonin 50 mijë euro për t’i liruar.
Dy prej autorëve afganë janë arrestuar në Malin e Zi, teksa Policia e Shtetit ka publikuar edhe pamjet ku shihen refugjatët të lidhur njëri pas tjetrit dhe dhunohen nga afganët me shkopinj.
Ky nuk është rast i vetëm, pasi sipas autoriteteve policore dyshohet se afganët janë të implikuar dhe në raste të tjera pengmarrjeje në të njëjtën zonë.
“Policia Shqiptare ka siguruar informacione për vendndodhjen e këtyre shtetasve dhe për elemente të tjera që çuan në identifikimin e autorëve. Informacionet u shkëmbyen nëpërmjet Europolit, me partnerët malazezë, të cilët angazhuan shërbimet e tyre policore dhe ushtarake, krehën zonën dhe mundësuan lokalizimin dhe kapjen në Mal të Zi, e 2 prej autorëve të rastit, emigrantë ilegalë nga Afganistani.
Nga hetimet dyshohet se këta dhe dy shtetas të tjerë janë të implikuar dhe në raste të tjera pengmarrjeje në të njëjtën zonë. Gjithashtu, u gjetën 11 emigrantët e marrë peng, të cilët ishin dhunuar nga shtetasit afganë.” – thuhet në njoftimin e Policisë
