Lulzim Bashës duket se e ka braktisur një tjetër deputete, teksa Flutura Açka ka deklaruar se nuk do t’i bashkohet grupimit të isj-kryedemokratit.
Pas largimit nga grupi Parlamentar i Partisë Demokratike dhe drejtimi i Komisionit të Medias, Açka tha gjatë një interviste në A2CNN se do të vazhdojë betejën në Parlament si deputete e pavarur.
“Nga 11 qershori unë e kam kuptuar se struktura jonë, nëse do të mbetej ashtu, nëse nuk do ti nënshtrohej një riformatimi që bazohet në dëshirat dhe iniciativat e një grupi njerëzish, por do të mbeste ashtu si ish-pjesë e PD ishte një gjë që nuk shkonte. Nuk e konceptoja të isha nënkryetarja e një gjëje që ishte paralele me PD. Që në momentin kur vula ka kaluar te PD, pra te Rithemelimi, s’ka as kuptim për të tilla formacione. Të paktën vetë nuk e shoh veten në të tilla formacione”, tha ajo.
Deputetja opozitare pranon se ky mandat mund të jetë i pari dhe i fundit për të, pasi thotë se nëse Kuvendi miraton draftin për mbylljen e një pjese të listave ajo nuk do të garojë.
“Nëse listat do të ishin hapur dje atëherë do të garoja si një deputete e pavarur dhe do të lija shqiptarët ta vendosnin ata, në të gjithë Shqipërinë, në një zonë, nëse do të isha ose jo deputete. Por në këto kushte, me këtë xhaketë të ngushtë, vetëm në dëshirën, egon apo kapriçon e një kryetari mendoj se nuk është një kafe për mua dhe këtu ndalem në një farë mënyrë. Por beteja opozitare do të vazhdojë”, shtoi Açka.
