Banorët e Memaliajt në një prononcim për mediat shprehen se janë të tronditur për atentatin me tre viktima të regjistruar mesnatën e kaluar, ku shënjestër ishte Shyqyri Kalemi, babai i Andrea (Adriatik) Kalemit.
Ata thonë se i njihnin për persona të mirë, teksa nuk pranojnë të prononcohen për problematikat që ka pasur familja Kalemi.
“Familje e mirë, në punën e tij. Nuk na erdhi mirë kur e dëgjuam. U ndodhëm këtu, nuk vajtëm me tutje se s’dnim gjë. Nuk dëgjova të shtëna. Po rrija këtu deri nga ora 1, të gjithë kishin vajtur unë nuk shkova. Shyqo në punë, në lokal, hallexhi si gjitë të tjerat. Se ç’kanë ata për brenda ne s’e demë. Ata janë njerëz të mirë. Siç jam unë, janë dhe ata, bile ata janë më të mirë nga mua, por biografinë s’ja u bëj dot.” – tha një banor.
“I njoh për shumë çuna të mirë. Njëri punonte aty, kurse tjetri vinte që konsumonte kafen aty. Të dy janë banorë të zonës. Jemi tronditur shumë nga kjo ngjarje. Të vriten tre veta është fatkeqësi e madhe.” – tha një banor tjetër i zonës.
74-vjeçari Shyqyri (Shyqo) Kalemi, i cili ishte dhe shënjestra e atentatit, mbeti viktimë e masakrës së djeshme, ndërsa nga breshëria e plumbave mbeti i plagosur edhe vëllai i tij, Artur Kalemi 57 vjeç, i cili ishte ulur në të njëjtën tavolinë me viktimën.
Po ashtu u vra dhe 36-vjeçari Gledio Muka, i cili punonte si kamarier në lokal ka qenë pranë tavolinës së vëllezërve Kalemi në pjesën e jashtme të lokalit, pasi nuk iu ka shpëtuar plumbave nga breshëria e kallashnikovit.
Ndërsa, Marsel Çela ishte klient në lokal dhe ndodhej në pjesën e brendshme të lokalit, por u kap nga plumbat dhe për pasojë edhe ai humbi jetën.
Artur Kalemi, i cili mbeti i plagosur u dërgua me urgjencë në spital dhe mësohet se ndodhet në reanimacion në spitalin e Gjirokastrës dhe ka marrë dy plumba, një në kofshë dhe një në kraharor.
Shyqyri Kalemi është babai i Andrea alias Adriatik Kalemi dhe Zamir Kalemit të cilit iu kanë shpëtuar tre atentateve të mëparshme. Ndërsa Artur Kalemi është xhaxhai i tyre. Një prej pistave ku po heton Policia është hakmarrja ndaj Andrea (Adriatik) Kalemit.
