Vendimin e 11 qershorit të Gjykatës së Apelit, ish-kryedemokrati Lulzim Basha e ka cilësuar si një marrëveshje të re mes kryeministrit Edi Ramës dhe liderit të opozitës Sali Berishës për një mandati të ri katërvjeçar në këmbim të vulës.
Në një konferencë për mediat, Basha tha se do të marrin pjesë në zgjedhjet parlamentare të pranverës së vitit 2025. Deputeti konfirmoi se do të bëjnë rekurs në Gjykatën e Lartë për çështjen e vulës së PD-së. Nëse deri atëherë drejtësia nuk do të ketë zgjidhur çështjen e vulës, tha Basha, atëherë mund të shihet çdo opsion që ofron Kodi Zgjedhor, përfshirë këtu edhe krijimin e një partie të re.
“Pa diskutim që po. Kjo është përtej çdo dyshimi…Ne do të jemi formacioni me listën e plotë të kandidatëve për deputetë. Jemi tashmë formacioni politik me program të shpallur. Pra, në këtë aspekt kemi treguar vendosshmëri, kemi treguar besueshmëri, kemi treguar produkt në krahasim edhe me partinë që qeveris vendin, e jo më me të tjerët.
Prej 14 qershorit vendimi është i qartë. Ne do të bëjmë rekurs dhe në çdo rast do të jemi në zgjedhje. Sigurisht nëse drejtësia mohohet, ose nuk jepet në kohë, ne do të shfrytëzojmë çdo hapësirë tjetër të Kodit Zgjedhor, duke përfshirë edhe atë që sapo përmendët për të qenë si alternativë në zgjedhjet e ardhshme parlamentare.” – tha Basha.
Ndërsa, në zgjedhjet e 4 Gushtit për bashkinë e Himarës, Lulzim Bashës konfirmoi se nuk do të marrë pjesë në garë.
“Nuk do të kemi kandidat në Himarë për arsyen e vetme se Gjykata e Apelit ka pamundësuar të regjistrohemi qoftë me identitetin politik që kemi pasur në 11 qershor qoftë me një tjetër, kështu që 4 gushtin ja kemi lënë ortakëve të OMONIA, megjithëse edhe aty pazari duket i qartë, nuk është bojkot. Himara duket që është fundi i një pazari të vjetër mes të dyve.”, tha Basha.
