Anëtari i kryesisë së PD-së, Belind Këlliçi ka komentuar protestën e djeshme, ku tha mesazhet ishin të qarta, dhe opozita kërkon qeveri teknike dhe lirim të kryetarit të opozitës.
I ftuar në Syri TV, Këlliçi u shpreh, se u pëlqen apo jo disa njerëzve, Sali Berisha është kryetari i PD-së.
“Mesazhet ishin të qarta.
Qeveri teknike dhe lirimi i kryetarit të opozitës. Duhet të jemi shumë realist për të thënë të vërtetën për qytetarët. Është protesta e dytë kombëtare në 5 muaj dhe në të dy këto protesta, kjo forcë politike vijon të ketë kryetarin e asaj në arrest shtëpie, pa fakte, prova dhe akuzë.
Mbrëmë ka qenë dita e 192 që Sali Berisha qëndron në shtëpi pa asnjë provë. Ende nuk ka një akuzë për të dhe PD-ja ja ka dalë jo vetëm të mbijetojë, por të ngjallë dhe besimin e dhjetëra e mijërave qytetarëve që dje mbushën bulevardin kryesor të vendit dhe sheshin para kryeministrisë, më shumë se kurrë.
Për hir të vërtetës, duke llogaritur temperaturat e larta dhe mesin e sezonit turistik, pjesëmarrja e djeshme ka qenë impresinuese.
Për tu rikthyer te mesazhi politik, nga dita e djeshme është hapur një kapitull tjetër edhe për aksionin opozita dhe politik të PD-së. Është artikuluar qartazi dhe prerë kërkesa jonë për qeveri teknike, zgjedhje të lira dhe të ndershme dhe lirimin e kryetarit të opozitës.
Duan apo nuk duan, ju pëlqen apo jo Sali Berisha, ai është sot kryetarit i PD-së dhe lideri i opozitës. Duan apo nuk duan, jemi i vetmi vend anëtar i NATO-s, që kryetarin e opozitës e kemi të burgosur në shtëpi, pa prova e fakte dhe pa akuzë.
Ndërkohë, kryeministri Rama është i kapur në afera nga më skandalozet korruptive. Mjafton të ju përmendim ekoparkun në Durrës ku me firmën e tij janë vjedhur dhjetëra milionë euro.
Kryetari i Bashkisë Tiranë, një ushtar i bindur i tij, hajdut banal si Erion Veliaj, është i kapur me duart brenda aferës së inceneratorit të Tiranës, bashkë me Edi Ramën, dhe tek afera e ‘5D’, ku drejtorët e tij hajdutë jo vetëm vidhnin vota, por edhe vidhnin tenderat 100% dhe ky SPAK nuk bën asgjë.
Pra dopjo standard më flagrant se ky, nuk ka pasur ndonjëherë asnjë institucion i drejtësisë shqiptare”, Belind Këlliçi.
