Opozita ka paralajmëruar se do të mbajë një protestë kombëtare të enjten e 11 korrikut, kundër skandaleve të qeverisë Rama.
Kryetari i Partisë Demokratike, Sali Berisha tha gjatë mbrëmjes së sotme se Shqipëria dhe shqiptarët kanë nevojë të mësojnë të vërtetat e skandaleve korruptive që kanë përfshirë vendin gjatë qeverisjes 11 vjeçare të Edi Ramës.
Gjatë protestës së mbajtur sot, kryedemokrati i bëri thirrje shqiptarëve që në 11 korrik të gjithë bashkë për të mposhtur pushtuesin e egër, Edi Rama.
“Të vërtetat dhembin. Edhe njëherë ju kujtoj një fjalë të Mark Tuin. Thotë se; kur thua të vërtetën duhet të harrosh çdo gjë.
Dhe kjo është rruga që ndjekim dhe do të ndjekim ne.
Ne do të ju themi shqiptarëve çdo të vërtetë, sepse ata sot si asnjë komb tjetër, janë një komb pa drejtësi.
Se ata sot si asnjë komb tjetër në planet janë një komb që po treten si bora para rrezeve të diellit, po zhduken.
Se ata sot janë një komb me fëmijë të uritur më shumë se vendet që dolën nga lufta, Ruanda e të tjerë.
Shqipëria pra dhe shqiptarët kanë nevojë të mësojnë të vërtetat, po aq sa kanë nevojë për ajrin, dhe ushqimin për të mbajtur gjallë jetën e tyre.
Ndaj dhe me 11 korrik shqiptarë dhe shqiptare kudo që jeni, në Shqipëri, emigracion, diasporë, të bashkohemi në sheshin Skënderbej, të na frymëzojë heroi ynë i përjashtëm për të mposhtur pushtuesin e egër që e ka emrin Edi Rama.
Për të mposhtur narkoshtetin dhe nomenklaturën e tij, për të krijuar qeverinë teknike.
Zgjedhje të lira, zgjedhje të ndershme, fitore të opozitës.
Shtet ligjore, liri dhe të drejta të njeriut.
Drejtësi të vërtetë të pavarur.
Integrim europian.
Këta janë parimet e shpallura për të cilat ne do të bëjmë gjithçka ti kthejmë në realitet, që ditën e parë të rikthimit të demokracisë në Shqipëri.
Rrofshi ju, rroftë Shqipëria.
Fitore, fitore, fitore!”, tha Berisha.
Kujtojmë që sot, Partia Demokratike publikoi edhe sloganin e protestës. “Të bashkuar në betejë” kjo është motoja e kësaj proteste, por me gjasë edhe e gjithë aksionit opozitar në muajt në vazhdim deri në nisjen e fushatës për zgjedhjet e përgjithshme të pranverës së 2025.
Nga ajo që është mësuar deri më tani, protesta do të nisë në orët e vona të pasdites, në mënyrë që vapa e nxehtë e korrikut të mos bëhet pengesë si për protestuesit që do të vijnë nga rrethet por edhe ata që do të dalin në shesh nga Tirana.
Fillimisht kjo protestë kur u diskutua në kryesinë e PD u propozua që të zhvillohej më datë 12 korrik, që përkonte në ditë të premte, por më pas Këshilli Kombëtar vendosi për 11 korrikun, si datë më të përshtatshme, për shkak se jemi në sezon pushimesh dhe protesta në ditë të premte mund të ndikonte në një numër të ultë qytetarësh në shesh.
Ndërsa kjo është protesta e dytë kombëtare që opozita organizon, pas asaj të 20 shkurtit të këtij viti.
