Policia e Vlorës në vijim të operacionit të koduar “Territori i Pastër” ka asgjësuar 320 bimë narkotike kanabisi.
Droga është gjetur në fshatin Trevllazër të Vlorës, teksa janë arrestuar 2 persona, të cilët janë kapur në flagrancë duke u kujdesur për bimët narkotike, ndërsa është shpallur në kërkim bashkëpunëtori i tyre.
Në pranga janë vënë shtetasit R. V., 23 vjeç dhe A. Ç., 49 vjeç. Sipas Policisë, ata ndodheshin nën masën e sigurisë “arrest shtëpi” në fushën e narkotikëve, të cilën e kanë thyer gjatë kohës që merreshin përsëri me kultivimin e bimëve narkotike.
Ndërkohë në kërkim është shpallur shtetasi R. H., 30 vjeç, banues në Vlorë, si bashkëpunëtor i dy të arrestuarve.
“Këta shtetas, brenda një parcele me ullinj në fshatin Trevllazër, kishin kultivuar 320 bimë kanabisi. Gjatë operacionit, dy shtetasit e vënë në pranga u kapën në parcelë, duke u kujdesur për bimët narkotike.
Gjatë hetimit proaktiv janë siguruar prova filmike kur këta shtetas, në bashkëpunim me njëri-tjetrin, shkonin në mënyrë të përsëritur te parcela për t’u kujdesur për bimët.
Shërbimet e Policisë kanë asgjësuar bimët narkotike, si dhe kanë sekuestruar në cilësinë e provës materiale, një makinë bujqësore traktor si dhe sende të tjera që shërbenin në këtë aktivitet kriminal.” – thuhet në njoftimin e bluve të qytetit bregdetar.
Materialet i kaluan Prokurorisë së Vlorës për veprime të mëtejshme.
