Presidenti i Partisë së Lirisë, Ilir Meta është ndalur tek varrezat e Kurveleshit, por është shprehur i shokuar për braktisjen totale të tyre.
Në një postim në Facebook, Meta thotë se “një popull që nuk respekton Dëshmorët ka probleme serioze me dinjitetin e tij dhe Lirinë”.
Meta i bëri thirrje kryetarit të bashkisë së Tepelenës, Tërmet Peçi të reagojë menjëherë.
“Shpresoj që Tërmeti si pasardhës i një familjeje me peshë në Luftën Antifashiste të mos e ketë parë këtë realitet dhe të reagojë menjëherë si Kryetar Bashkie”– tha Meta.
Postimi i Ilir Metës
Rrugës drejt Këndrevicës nuk mund të mos ndaloja te varrezat e Kurveleshit, një prej krahinave më heroike në luftrat kundër pushtuesve e sidomos në atë kundër nazifashistëve.
I shokuar për braktisjen e tyre totale dhe jo të rastësishme.
Këtu ku bari dhe gjembat mbulojnë varret dhe emrat e bijve dhe bijave të paharrueshme që dhanë jetën anembanë Shqipërisë.
Këtu ku kalojnë sot edhe shumë turistë të huaj të cilët edhe vetëm për kuriozitet mund të ndalojnë për të bërë një foto apo pyetur se ç’është ky monument.
Një popull që nuk respekton Dëshmorët ka probleme serioze me dinjitetin e tij dhe Lirinë.
Shpresoj që Tërmeti si pasardhës i një familjeje me peshë në Luftën Antifashiste të mos e ketë parë këtë realitet dhe të reagojë menjëherë si Kryetar Bashkie.
