Zëvendëskryeministri Besnik Bislimi deklaroi se Kosova ka paguar shtrirjen e sovranitetit në veri me masat e Bashkimit Evropian dhe sipas tij kjo ia ka vlejtur.
Gjatë raportimit në Komisionin parlamentar për Integrime Evropiane, Bislimi tha se aktualisht situata në veri në krahasim me tri vite më parë ndryshon si nata me ditë.
“Dëmi është bërë. Mirëpo tash në situatën që kemi qenë atëherë ne është dashur të marrim vendim ose me heq dorë nga sovraniteti në veri ose me pagu një çmim për insistimin tonë për sovranitetin në veri. Ne mendojmë se ia ka vlejtur për arsye se situata sot në veri është sikur nata me ditën me situatën para dy-tri viteve”, u shpreh Bislimi.
Bislimi përmendi mbylljen e rrugëve ilegale, laboratorëve të drogës, pagesën e energjisë elektrike, pagesat në euro si ndryshime pozitive në veri.
Ai tha se nuk iu dorëzuan kërkesave të Milan Radoiçiçit dhe koha dëshmoi se kishin të drejtë.
“Kërkesa ka qenë ti me dal në zgjedhje, të fitosh edhe të mos shkosh në zyre, pasi Radojiçiç po dëshiron që ti të mos shkosh në zyre. Tash na masat i kemi paguar por Radojçiqi është në arrati dhe të gjithë Evropa e konsideron kriminel”, tha Bislimi.
Pas raportimit në komision, Bislimi para gazetarëve deklaroi se themelimi i Asociacionit të komunave me shumicë serbe nuk ka qenë kusht për heqjen e masave.
“Masat janë shumë specifike, janë të caktuara. Është deklarata e zotëri Borrell më 3 qershor 2023 dhe aty nuk përmendet Asociacioni. Këto janë spekulime… Ka interesa të ndryshme të vendeve anëtare, jo të gjitha shtyjnë përpara interesa të BE-së dhe Kosovës po ka aty që favorizojnë disa kërkesa të Serbisë. Besojnë se në këtë mënyrë mund të tërheqin Serbinë drejt perëndimit”, tha zëvendëskryeministri.
Kosova vijon të jetë nën masa ndëshkuese nga qershori i vitit 2023 pas tensioneve në katër komunat veriore.
