Edhe pse opozita është deklaruar e prerë kundër dhe po e bojkoton, socialistët duken këmbëngulës për të vazhduar punën në mënyrë të njëanshme në të ashtuquajturin Komision i Posaçëm Anti-Korrupsion, i cili është konsideruar si një tentativë të kryeministrit Edi Rama për të vënën nën kontroll SPAK-un dhe GJKKO-në.
Në një lajm të gatshëm të shpërndarë për mediat, raportohet se deputeti socialist Fatmir Xhafaj, vëllai i trafikantit të drogës Geron Xhafaj, ka zhvilluar këtë të martë një mbledhje vetëm me pjesën e Sekretariatit Teknik të këtij komisioni.
Si kryetar i komisionin në fjalë, raportohet se Xhafaj ka ndarë disa detyra që lidhen me punën organizative dhe zbatimin e vendimeve që u morën në mbledhjen e parë të tij.
Sekretariati është duke përgatitur shkresat që do të dërgohen pranë institucioneve të pavarura që krijohen dhe japin llogari te Kuvendi (Avokati i Popullit; Kontrolli i Lartë i Shtetit; Komisioni i Prokurimit Publik; Inspektorati i Lartë i Deklarimit dhe Kontrollit të Pasurive dhe Konfliktit të Interesave; Autoriteti i Mbikëqyrjes Financiare; Autoriteti i Konkurrencës; Instituti i Statistikave), për të përcaktuar ekspertët dhe përfaqësuesit që do të punojnë me 3 nëngrupet e Komisionit të Posaçëm: Mirëqeverisja, Sundimi i Ligjit dhe Antikorrupsioni.
Gjithashtu raportohet se do të ketë kërkesa zyrtare nga komisioni për organizatat e shoqërisë civile, institucionet akademike publike e private, si dhe një ftesë për organizatat ndërkombëtare për bashkëpunim, asistencë dhe ekspertizë.
Konstituimi i të ashtuquajturit Komision i Posaçëm Anti-Korrupsion u bë ditën e premte, ku në mbledhje ishin të pranishëm vetëm deputetët socialist, teksa u bojkotua nga opozita, e cila ka bojkotuar edhe dy votimet në Kuvend.
Sipas draftit të miratuar në Kuvend, komisioni ka në përbërjen e tij 11 anëtarë, 6 nga PS dhe 5 nga opozita, ku anëtarët janë kryetarët dhe zv. kryetarët e 4 komisioneve të përhershme parlamentare dhe ata të Këshillit të Integrimit Evropian.
