Janë zbardhur detaje të reja nga aksioni i Policisë së Tiranës, ku u godit një grup i trafikut të lëndëve narkotike.
Njësia e Anti-Drogës, pas informacioneve të marra, gjeti dy çanta me kanabis me peshë totale mbi 19 kg në bagazhin e automjetit tip “Benz” që drejtohej nga 50-vjeçari Gazmend Hoxha, teksa në pranga u vunë dhe shtetasit Aleksandër Kili, 37 vjeç, Saimir Gërbaj, 54 vjeç, dhe Orgest Beqo, 43 vjeç, të katërt banues në Tiranë. Ndërkohë, gjatë kontrollit të banesës së Aleksandër Kilit, uniformat blu gjetën dhe një armë zjarri pushkë dhe 200 fara kanabisi.
Burime për mediat bëjnë me dije se ky grup kriminal ishte përfshirë prej kohësh në shitjen e lëndëve narkotike, kryesisht në Tiranë. Gjithashtu, mësohet se dorga dyshohet se do të shitej në kryeqytet me më shumë se dy mijë euro kilogramin.
Po të njëjtat burime bëjnë me dije se grupi hetimor ka dyshime se kanabisi ishte kultivuar përmes llambave në një “shtëpi bari” që dyshohet se ndodhet në jug të vendit. Antidroga e Tiranës po heton për zbulimin e vendndodhjes së banesës.
Mësohet se grupi kriminal, në momentin që sillte lëndën narkotike në kryeqytet ndaheshin në dy automjete, njëra hapte rrugën dhe kontrollonte nëse ka apo jo prezencë të Policisë dhe mjeti i dytë kishte në bagazh kanabisin. Të dyja automjetet janë sekuestruar nga Policia.
