Policia e Shkodrës ka zbardhur ngjarjen e rëndë të regjistruar mesditën e djeshme në rrugën “Pogej” të lagjes Rus, ku një grup personash dhunuan me sende të forta 62-vjeçarin Vladimir Bruçi.
Sipas bluve të kryeqendrës së Veriut, shkaku i konfliktit mes tyre ka qenë për vendparkimin e automjeteve. Uniformat blu kanë identifikuar autorët, duke arrestuar një prej tyre, teksa 5 të tjerë janë shpallur në kërkim.
Më kokretisht është vënë në pranga shtetasi Edmond Sakicaj, 47 vjeç, ndërsa janë shpallur në kërkim shtetasit Izmir Sakicaj, 23 vjeç, Samet Halluni, 27 vjeç, Arlind Kajoshi, 31 vjeç, Samuel Troshani, 24 vjeç dhe Alban Bruçi, 27 vjeç, të gjithë banues në Shkodër.
Ata akuzohen për kryerjen e veprave penale “Vrasja”, kryer në bashkëpunim, mbetur në tentativë, “Mbajtja pa leje dhe prodhimi i armëve, armëve shpërthyese dhe municioneve” dhe “Veprime që pengojnë zbulimin e së vërtetës”.
“Këta shtetas kanë goditur fizikisht dhe me sende të forta, gjatë konfliktit për vendparkimin e automjeteve, shtetasin Vladimir Bruçi, i cili vijon të jetë në kujdesin e mjekëve. Nga veprimet hetimore dyshohet se shtetasi Edmond Sakicaj ka patur me vete armë zjarri, ndërsa shtetasi Alban Bruçi dyshohet se ka kryer veprime që pengojnë zbulimin e ngjarjes. Vijon puna për kapjen e shtetasve në kërkim dhe për dokumentimin e plotë të rrethanave të rastit.” – thuhet në njoftimin e Policisë.
Materialet procedurale i kaluan Prokurorisë së Shkodrës për veprime të mëtejshme.
