Një 35-vjeçar ka përfunduar në prangat e policisë në Durrës, pasi ka vjedhur tre biçikleta gjatë muajit maj në qytetin bregdetar.
U mësua se 35-vjeçari është dënuar edhe më herët për veprën penale të vjedhjes, ndërkohë që vijon hetimi për të parë nëse ai ka kryer grabitje të tjera.
Biçikletat janë sekuestruar nga policia, në cilësinë e provës materiale.
“Vodhi 3 biçikleta, gjatë muajit maj, identifikohet, kapet dhe vihet në pranga 35-vjeçari, i dënuar më parë për vjedhje.
Sekuestrohen veshje që autori i përdorte kur kryente vjedhje.
Si rezultat i veprimeve hetimore të kryera në kuadër të operacionit policor të koduar “Again”, për zbardhjen e rasteve të vjedhjes, Komisariati i Policisë Durrës ka zbardhur 3 raste të vjedhjes së biçikletave, të kryera gjatë muajit maj, në qytetin e Durrësit.
Në vijim të veprimeve procedurale u arrestua autori i dyshuar, shtetasi S. T., 35 vjeç, banues në Durrës, i dënuar më parë për veprën penale “Vjedhja”.
Në cilësinë e provës materiale janë sekuestruar veshje që ky shtetas i përdorte gjatë vjedhjeve.
Vijon puna hetimore për zbardhjen e vjedhjeve të tjera që mund të ketë kryer shtetasi S. T.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme”, thuhet në njoftimin e Policisë.
