Anëtarja e Këshillit Bashkiak të Tiranës e Lëvizjes Bashkë, Mirela Ruko e cila debatoi me kryebashkiakun Erion Veliaj në mbledhjen e së enjtes, thotë se ka qenë nën presion gjatë gjithë kohës me roje të sigurisë mbrapa shpinës.
Sipas saj, Veliaj ndihet i frikësuar, jo vetëm me kontrollet policore para hyrjes në mbledhje, por edhe duke iu vendosur roje pas shpine dhe duke i kontrolluar lëvizjet e tyre.
Në një lidhje “Skype” me MCN TV, Ruko tha se Veliaj nuk qëndroi më shumë se 10 minuta në mbledhje, pasi sipas saj, ai nuk ndihej i sigurt as me Policinë as me rojet e sigurisë brenda sallës. Anëtarja e Këshillit Bashkiak e konsideroi Veliajn si një hajdut.
“Mendoj se anëtarët e Këshillit Bashkiak e duan më shumë sallën se jemi zgjedhur për të qenë aty dhe e respektojmë në mënyrë maksimale atë. Unë kam hyrë në sallë, kam pranuar të kontrollohem se nuk doja të ishte pengesë për të thënë të vërtetën brenda asaj salle.
Kjo s’më jep asnjë ndjesi mua, por Veliajt, ai ndihet i frikësuar, jo vetëm me kontrollet policore para hyrjes, por edhe duke na vendosur roje pas shpine dhe duke kontrolluar lëvizjet tona. Unë kam pasur pas shpine një roje sigurie dhe kur kam reaguar është ngritur. Nuk ka bërë veprime, por ishte i gatshëm të më përgjigjej mua, anëtare e Këshillit Bashkiak që kam të drejtën e replikës dhe të marrjes së fjalës.
Unë nuk jam në dijeni të ndonjë plani të tillë, nuk e di nëse ka qenë policia. Kam shkuar në mbledhje ashtu siç shkohet në çdo mbledhje të Këshillit Bashkiak duke përdorur çdo mjet demokratik që më kanë dhënë qytetarët.
Veliaj është i frikësuar nuk qëndroi më shumë se 10 minuta. Nuk ndihej i sigurt as me policinë as me rojet e sigurisë brenda sallës. Është hajdut nuk ka si ndihet ndryshe.” – tha Mirela Ruko.
