Kuvendi ka miratuar ngritjen e të ashtuquajturit Komision i Posaçëm Antikorrupsion. Pro ngritjes së këtij komisioni kanë votuar 74 socialistët, teksa 6 deputet kanë votuar kundër dhe asnjë abstenim.
Deputetët që kanë votuar kundër kanë qenë Ervin Salianji, Agron Shehaj, Albana Vokshi, Elda Hoti, Lindita Metaliaj dhe Ilda Dhori. Pjesa tjetër e deputetëve nuk kanë marrë pjesë në votim.
Ngritja e këtij Komisioni të Posaçëm vjen pas miratimit të hënën në Kuvend të rezolutës “Për thellimin e reformave për mirëqeverisjen, sundimin e ligjit dhe antikorrupsionin për Shqipërinë 2030 në Bashkimin Europian”.
Opozita e ka interpretuar ngritjen e këtij Komisioni të Posaçëm si një tentativë të kryeministrit Edi Rama për të vënën nën kontroll SPAK-un dhe GJKKO-në. Po ashtu është konsideruar edhe si një manovër elektorale nga ana e kryeministrit Edi Rama ngritja e këtij komisioni.
Komisioni është konceptuar me 11 anëtarë, 6 nga PS dhe 5 nga opozita, teksa posti i kryetarit do t’i përkasë socialistëve. Sipas draftit të publikuar një ditë para votimit në seancë plenare, anëtarët do të jenë kryetarët dhe zv. kryetarët e 4 komisioneve të përhershme parlamentare dhe ata të Këshillit të Integrimit Evropian.
Në krye të këtij komisioni, Edi Rama pritet të vendosë Fatmir Xhafajn, vëllain e trafikantit të drogës Geron Xhafaj, duke e kthyer sërish për t’i shërbyer, pasi e flaku disa vite më parë nga Ministria e Brendshme.
Deri më tani opozita ka deklaruar se nuk do të bëhet pjesë e këtij komisioni të propozuar nga socialistët, ashtu siç kanë dëshmuar edhe dy votimet në Kuvend, teksa pritet të shihet se si do të plotësohet përbërja e tij.
Komisioni i Posaçëm do të zhvillojë veprimtarinë e tij në një afat kohor 10 mujor. Në rast nevoje, me kërkesë të arsyetuar të komisionit, Kuvendi mund të vendosë zgjatjen e afatit të ushtrimit të veprimtarisë së komisionit.
Sipas draftit të miratuar në Kuvend, Komisioni i Posaçem do të ketë si synim përmirësimin dhe konsolidimin e praktikave të mirëqeverisjes në të gjitha nivelet, thellimin e luftës kundër korrupsionit dhe forcimin e mëtejshëm të zbatimit të ligjit, duke patur si udhërrëfyes gjetjet dhe rekomandimet e raporteve të Bashkimit Evropian dhe raportit Screening të Komisionit Evropian për grupkapitullin e parë, si dhe adresimin e masave të udhërrëfyesve të miratuar nga qeveria “Për shtetin e së drejtës” dhe “Reformën në administratën publike”.
Socialistët kanë 11 vite në Qeveri, teksa janë “të mbytur” në akuza për korrupsion dhe Shqipëria në çdo raport del si vendi më i korruptuar në Europë, teksa mazhoranca të kujtohet 1 vit para zgjedhjeve për të luftuar korrupsionin në vetëm 10 muaj.
