Vështirë se në fillim të sezonit, apo ndoshta edhe deri në mesin e tij, do t’ia merrte mendja dikujt se “Final 4” do të vendosej në javën e fundit dhe për të qenë pjesë e ndeshjeve ku caktohet kampioni do të pretendonte edhe skuadra e vendit të shtatë.
Ja që ndodh kështu dhe parashikimet apo hamendësimet mund të çojnë në skenarë nga më të ndryshmet. Fakti është se asgjë nuk mund të quhet e mbyllur dhe se çdo kombinim rezultatesh mund të prodhojë një përfundim të ri. Aktualisht në vendin e katërt është Skënderbeu me 48 pikë, teksa Tirana, Teuta dhe Dinamo ndjekin me 47 pikë.
Duhet thënë se nisur nga fakti se kanë një pikë më shumë se të tjerët, korçarët nisen si skuadra favorite për “Final 4” në ndeshjet e sotme. Ata sfidojnë Vllazninë në Shkodër në ndeshjen e fundit. Kuqeblutë kërkojnë vendin e dytë, por shanset i kanë shumë të vogla, sepse Partizani luan në shtëpi me Erzenin e rënë nga kategoria.
Në rast fitoreje, Skënderbeu kualifikohet automatikisht si e vetmja skuadër, që e ka fatin e vet në dorë. Në rast barazimi, do të duhej që tri skuadrat e tjera të ndaleshin me humbje ose barazim.
Në rast humbjeje në Shkodër, Skënderbeu ka bilanc negativ me të gjitha dhe fakti që Dinamo dhe Teuta luajnë me njëratjetrën, i nxjerr automatikisht jashtë loje. Duhet thënë se korçarët nuk luajnë dot në Europë dhe nisur nga kjo, Vllaznia do të siguronte 100% pjesëmarrjen në Europë nëse humbet ndeshjen e fundit.
Me rastet e shumta të humbura kundër Vllaznisë, Tirana ia komplikoi shumë vetes shanset për “Final 4”. Në rast fitoreje të tyre në Rrogozhinë kundër Egnatias, bardhebluve do t’i duhej një barazim ose humbje e Skënderbeut në Shkodër për të kaluar në “Final 4”.
Fitorja e Dinamos ose Teutës nuk e rrezikon Tiranën nëse mposht Egnatian, pasi bardheblutë kanë bilanc pozitiv në ndeshjet direkte me ta. Në rast barazimi kundër Egnatias shanset ulen së tepërmi. Do të duhej që Skënderbeu të mposhtej dhe dy të tjerat të barazonin mes tyre. Në këtë rast do të shkonin katër skuadra me pikë të barabarta dhe Tirana do të kalonte në katërshe, pasi ka bilanc pozitiv me të gjitha.
