Deputeti i PD-së, Lulzim Basha, ndryshe nga sa deklaroi dy ditë më parë, u shpreh sot i hapur që të punojë me mazhorancën, pas propozimit të kësaj të fundit për një Komision të Posaçëm antikorrupsion, por me kushte.
Në një prononcim për mediat nga oborri i Kuvendit, Basha tha se duhet të marrë garanci nga SHBA për transparencë, ndërsa shtoi se është i gatshëm të ulet nëse bëhet vettingu i politikanëve.
Basha: Pjesë e procesit të luftës kundër korrupsionit është PD. Ndaj e përshëndes Ambasadën amerikane që kërkon transparencë. E vetmja parti që kërkon transparencë është PD dhe i depoziton ato në institucione. Këta duan që ta zhbëjnë SPAK. E shoh si inkurajon për veprat tona dhe paralajmërim për ata që flasin dhe bëjnë gjë tjetër. PD ka propozuar vettigun e politikanëve dhe pas 6 muajsh duan ta fusin në Kuvend, e përshëndes këtë gjë. Bashkëpunimi duhet të jetë bipartizan dhe transparent.
Pyetje: A jeni gati të bashkëpunoni me Edi Ramën për rezolutën anti korrupsion?
Basha: PS nuk ka nismë, por një deklaratë qesharake që nuk i shkon një qeverie 11-vjeçare. Nuk besoj se shpallje të tilla para elektorale përbejnë bazë për një diskutuam serioz. Diskutime serioze bëhen mbi dokumente serioz është propozimi për vettingun e politikanëve , dokument serioz është heqja e imunitetit të deputetëve, projekt serioz është propozimi ynë për të forcuar SPAK dhe projekt serioz është propozimi ynë për reformën zgjedhore me 4 shtylla.
Pyetje: Ju i leni Ramës një derë të hapur, a mund të ketë një 17 maj të dytë ?
Basha: Ndryshe nga hënë, dielli, toka dhe kalendarët e tjera, politika duhet të ndjekë kalendarin e interesit publik. Këto 11 vite të rënda për Shqipërinë, Kuvendi është përgjysmuar, ti përgjigjemi jo me akte formale, akte para elektorale sepse në shtator në të gjithë do jemi në fushatë, PS është që tani në fushatë. Fjalët dhe veprat ndahen si shapi me sheqerin.
